Presidentja Osmani shpreh ngushëllime për vdekjen e artistit Ismet Bogujevci

Presidentja e Republikës së Kosovës, Vjosa Osmani ka shprehur ngushëllime për ndarjen nga jeta të doajenit të këngës popullore shqipe, Ismet Bogujevcit.

“Sot humbëm zërin unik të këngës sonë popullore. Ismet Bogujevci është artisti i këngës që një jetë të tërë ia kushtoi jetës skenike muzikore. Me Ansamblin “Shota”, ai afirmoi traditën dhe kulturën tonë muzikore, ndaj me të drejtë bart titullin e doajenit”, ka theksuar Presidentja Osmani.

Sipas Omsanit, brezave do t`u mbetet trashëgim një fond i pasur i muzikës së mirëfilltë shqipe të interpretuar nga Ismet Bogujevci.

“Në këtë opus interpretues të Ismet Bogujevcit, gjurmë të pashlyeshme do të lë interpretimi maestral i këngës “Kur ma falë një tufë gërshetë”, në duet me Bilbilin e këngës shqipe, Nexhmie Pagarusha. Muzika ishte jeta për të, ndaj ikja  do të lë një zbrazëtirë në skenën muzikore të Kosovës. U dëgjoftë përherë zëri i Ismet Bogujevcit”, thuhet në mesazhin e Presidentes Osmani.

Siç raportoi sot KALLXO.com, për vdekjen e këngëtarit të njohur Ismet Bogujevci ka njoftuar Rigon Bogujevci, djali i këngëtari përmes Facebookut.

“Ju njoftojmë gjithë familjes dhe miqësisë se sot me 13 maj ndërroi jetë më i shtrenjti ynë, kaluam shumë sfida bashkë babë pusho n’ paqe me tingujt e muzikës tënde që kur s’kanë me u shu”, ka shkruar Rigon Bogujevci, në Facebook.

 

Ka vdekur këngëtari Ismet Bogujevci