Foto: Presidentja e Kosovës, Vjosa Osmani, Facebook
Presidenti i Shqipërisë i rikonfirmon mbështetjen Presidentes Osmani, bisedojnë në telefon
Presidenti i Shqipërisë, Bajram Begaj ia ka rikonfirmuar mbështetjen e palëkundur të Shqipërisë për Kosovën, Presidentes Vjosa Osmani, përmes një bisede telefonike, pas sulmit të mbrëmshëm në veri të vendit.
“Presidenti Begaj rikonfirmoi mbështetjen e palëkundur të Shqipërisë për Kosovën, veçanërisht në dritën e zhvillimeve të fundit në fushën e sigurisë” – ka njoftuar Presidenca e Kosovës.
Presidenca shtoi se Osmani e ka njoftuar homologun e saj për zhvillimet e fundit në veri, cenimin e sigurisë kombëtare nëpërmjet sulmeve në infrastrukturën kritike dhe për masat e marra nga institucionet për të menaxhuar këtë situatë.
Në njoftim thuhet se të dy presidentët kanë theksuar rëndëinë e bashkëpunimit të vaxhdueshëm mes Kosovës e Shqipërisë në adresimin e sifdave të sigurisë rajonale.
Vetë Begaj ka thënë në rrjetin social X se e dënon ashpër aktet terroriste me lëndë eksplozive mbi Kanalin e Ibër-Lepencit.
Zhvillova një bisedë telefonike me Presidenten e Republikës së Kosovës, @VjosaOsmaniPRKS , ku
dënova ashpër aktet terroriste me lëndë eksplozive mbi Kanalin e Ibër-Lepenic, që synojnë shkatërrimin e infrastrukturës kritike të Kosovës e cënojnë sigurinë kombëtare të Kosovës.…— Bajram Begaj (@BajramBegajAL) November 30, 2024
Ministrja e Ekonomisë, Artane Rizvanolli ka njoftuar sot se pavarësisht dëmtimit që shpërthimi shkakoti në kanalin e Ibër Lepencit,kanë arritur të sigurojnë energji elektrike për vendin përmes vendosjes së gjashtë gypave të përkohshëm, me kapacitet të mjaftueshëm për të siguruar ujë për ftohjen e termocentralit “Kosova B”.
Ndërsa, për shkak të këtyre zhvillimeve, Presidentja Vjosa Osmani ka anuluar vizitën shtetërore në Brunei të Azisë.
Të gjitha lajmet rreth situatës pas shpërthimit në kanalin e Ibër Lepencit, mund t’i lexoni në artikullin e mëposhtëm.
Lajm në Zhvillim: Shpërthim në Zubin Potok, dëmtohet kanali i ujit të Ibër-Lepencit
