Presidenti Begaj: Qëndresa dhe heroizmi i Familjes Jashari janë guri i themelit të lirisë së Kosovës

Presidenti i Shqipërisë, Bajram Begaj, ka kujtuar heroizmin e komandantit legjendar Adem Jasharit dhe gjithë dëshmorëve që dhanë jetën në betejën e Prekazit 25 vjet më parë.

“Sot në këtë 25-vjetor të Betejës së Prekazit, nderojmë me respekt heroin dhe komandantin legjendar, Adem Jasharin, si edhe dëshmorët e lirisë të cilët dhanë jetën në këtë betejë pas tri ditëve rezistencë dhe heroizëm” – ka shkruar Begaj në Facebook.

Presidneti i Shqipërisë ka thënë se do të duhej qëndresa dhe heroizmi i Adem Jasharit dhe i familjes së tij që Kosova të fillonte një epokë të re, atë të lirisë dhe demokracisë, gjersa ka cilësuar se ata janë guri i themelit të lirisë së saj.

“Lavdi veprës heroike të Komandantit legjendar Adem Jashari dhe të gjithë atyre që sakrifikuan për lirinë e Kosovës!” – ka përmbyllur Begaj në Facebook.

Në sulmin e forcave serbe, që ka nisur 5 dhe ka zgjatur deri më 7 mars të vitit 1998, janë vrarë 55 persona, 22 prej të cilëve ishin familjarë të ngushtë të Adem Jasharit.

Këtij sulmi i ka mbijetuar vetëm Bashkimi, djali i Rifatit, i cili ia ka dalë që mes datës 5-6 mars të largohej nga rrethimi dhe arrin t’i shpëtojë sulmit, si dhe Besarta, vajza e Hamzës, e cila ka parë dhe përjetuar betejën titanike të familjes së saj.