Policia: Të dyshuarit për rrahje me karrige ishin të dehur - VIDEO
KALLXO.com ka raportuar mbrëmë për një rrahje masive në mes dy grupeve në Gjilan.
Zëdhënësi i policisë në rajonin e Gjilanit, Ismet Hashani ka dhënë detaje për KALLXO.com për rrahjen e cila ka ndodhur para dy netëve.
“Policia në Gjilan është njoftuar për një rast rrahje në pompën e karburanteve HIB Petrol. Nga informatat e marra, incidenti ka ndodhur në orët e vona të datës 12 gusht, në mes pesë personave të dyshuar”, ka thënë Hashani.
Ai tutje ka bërë të ditur edhe arsyen e rrahjes mes personave të dyshuar në Gjilan.
“Pas një fjalosje të ashpër ka ardhur deri tek rrahja mes tyre, duke goditur njëri-tjetrin me mjete të forta. Njëri nga personat e përfshirë në incident ka pësuar lëndime dhe ka kërkuar ndihmën e mjekut”, ka thënë Hashani.
Sipas Hashanit, policia ka arritur të identifikoj të dyshuarit e përfshirë në këtë rrahje, dhe në bazë të matjeve me alkootest ka rezultuar se të gjithë të dyshuarit kanë qenë nën ndikimin e alkoolit.
“Për rastin është njoftuar prokurori i shtetit, ndërsa njësitet e hetimeve në Stacionin Policor në Gjilan janë duke bërë hetimet rreth rastit”, ka përfunduar Hashani.
KALLXO.com ka publikuar mbrëmë videon nga rrahja masive në Gjilan.
VIDEO e rrahjes: