Policia reagon për shkrimet e publikuara në media serbe për të miturin në Plemetin

Policia e Kosovës ka reaguar në lidhje me disa shkrime të publikuara në mediat serbe për tentim kidnapimin e një fëmije në fshatin Plemetin të Obiliqit.

“Lidhur me informacionet e publikuara në mediat serbe, që sipas tyre, në fshatin Plemetin të Obiliqit ka ndodhur një “tentim kidnapimi”, ndaj një fëmije 9 vjeçar ju njoftojmë se këto publikime janë të pasakta dhe me tendenca dashakeqe për qëllime të caktuara që nuk i shërbejnë ruajtjes së rendit, qetësisë dhe sigurisë së përgjithshme për të cilën Policia e Kosovës po punon me përkushtim dhe profesionalizëm”, thuhet në reagimin e policisë.

Policia ka bërë të ditur se dje rreth orës 14:00, ka pranuar një informatë nga një qytetar serb i Kosovës me banim në fshatin Plemetin të Obiliqit, lidhur me dyshimet për tentim të kidnapimit të fëmiut të tij.

“Policia e Kosovës ka ndërmarr veprimet e menjëhershme duke dërguar njësinë policore së bashku me hetuesit policor, të cilët  kanë kontaktuar dhe biseduar me palën ankuese lidhur me thirrjen telefonike. I njëjti ka njoftuar se fëmiu i tij kishte ardhur në shtëpi duke vrapuar, ku sipas tij, një veturë ishte ndalur pranë tij dhe fëmiu është frikësuar, nga se sipas tij kishin tentuar ta fusnin në veturë. Zyrtarët policor në prezencën e prindit kishin zhvilluar një bisedë verbale me fëmiun, ku deklarata dhe informacionet e tija ishin kundërthënëse dhe jo kredibile, të cilat ngjallnin dyshime”, thuhet në reagim.

Sipas policisë, prindi i fëmijës nuk ka qenë i interesuar që të japë deklaratë apo për të iniciuar rast, pasi që edhe ai e kishte kuptuar dhe ngritur dyshimet se një gjë e tillë kishte ndodhur.

“Vlen të potencohet se të gjitha veprimet policore janë ndërmarr gjithnjë në konsultim dhe bashkërendim me prokurorin kompetent. Policia e Kosovës ka ndërmarr veprime të vazhdueshme që të shikohet edhe mundësia e verifikimit përmes kamerave, për të vërtetuar se në atë interval kohorë kur ka lajmëruar qytetari, a ka  kaluar ndonjë veturë apo edhe ndonjë kalimtar i rastit që ka qenë në afërsi. Megjithatë, pas verifikimeve në teren dhe shikimit të kamerave nga hetuesit kompetent policor, sipas incizimeve të intervalit kohor të lajmëruar, prej orës 12:30-13:45 kanë kaluar gjithsej 10 vetura dhe asnjë prej tyre, nuk përputhet me deklarimet e fëmiut”, thuhet në reagim.

Policia e Kosovës ka thënë se për të ruajtur rendin dhe garantuar sigurinë publike ka hartuar një plan veprimi operacional konkretisht në fshatrat e përziera multietnike, gjegjësisht fshatin Babimovc, Plemetin dhe Vodicë, duke shtuar veprimtarinë patrulluese, si në aspektin preventiv po ashtu edhe operativ, me qëllim të parandalimit të ndonjë veprimi që ka për qëllim cenimin e sigurisë së qytetarëve tanë pavarësisht etnitetit që i takojnë ata.