Policia kufitare e Kosovës arreston 21-vjeçarin nga Shqipëria, u kap me një bidon me drogë
Policia e Kosovës ka njoftuar për arrestimin e një personi të dyshuar për posedim të narkotikëve.
Sipas njoftimit, Policia e Kosovës gjatë ditës së sotme, rreth orës 13:45, në pikën e kalimit kufitar Qafë Morinë në hyrje nga territori i Republikës së Shqipërisë për në Republikën e Kosovës ka ndalur për kontrollim një veturë me targa të Shqipërisë.
“Veturën e drejtonte A.I., 21 vjeçar, shtetas i Shqipërisë. Pas përzgjedhjes së automjetit për kontrolle në vijën nga ana e zyrtareve policorë, është vërejtur se në ulësen e pasme kishte një bidon në të cilin kishte futur substancë narkotike që dyshohet të jetë marihuanë, me peshë rreth një kilogram”, thuhet në njoftimin e Policisë.
Lidhur me rastin është njoftuar Prokurori i Prokurorisë së Gjakovës dhe të gjitha njësitet relevante kanë dalë në vendin e ngjarjes dhe janë marrë me rastin.
I dyshuari është arrestuar dhe substanca e dyshuar narkotike është konfiskuar.