Policia kërkon ndihmë nga qytetarët për t`i identifikuar pronarët e parave të gjetura

Policia e Kosovës ka bërë publike dy raste të gjetjes së parave në Fushë Kosovë. Policia ka kërkuar ndihmën e qytetarëve për t`i identifikuar pronarët e parave të humbura në dy raste.

Në njërin rast, siç njofton Policia paratë janë gjetur nga një zyrtar policor dhe në rastin tjetër nga një qytetare, që të dy rastet kanë ndodhur në Fushë Kosovë, ku deri më tani nuk është lajmëruar askush si ankues (pronar i parave të humbura).

“Më 02.06.2020 rreth orës 20:00 në Fushë Kosovë, nga një zyrtar policor është gjetur një portofol (kuletë) me një shumë të konsiderueshme parash (shumë tre shifrore)”, njofton Policia.

“Me datë 03.06.2020, rreth orës 20:00 një qytetare i ka dorëzuar një shumë parash (dhjetëra euro) njësisë patrulluese në detyrë, e cila ka deklaruar se parat e humbura i kishte gjetur në rrugë, afër rreth rrotullimit në qendër të Fushë Kosovës”, thuhet në njoftimin e Policisë.

“Me këtë rast falënderojmë qytetaren për gjestin e bërë dhe besimin e treguar për Policinë e Kosovës, falënderojmë njëkohësisht të gjithë qytetarët për bashkëpunimin në raste si kjo dhe jo vetëm. Ftojmë pronarët e këtyre të hollave të shkojnë në Stacionin Policor Fushë Kosovë që të kryejnë procedurat e nevojshme rreth pranimit të parave të humbura”, thuhet në njoftim.