Foto: Urim Krasniqi/KALLXO.com
Polici i plagosur mbrëmë në veri po trajtohet në QKUK
Një pjesëtar i Policisë së Kosovës është lënduar mbrëmë rreth orës 23 :00 në fshatin Serbovc, Komuna e Zveçanit.
KALLXO.com mëson që polici është sjellë për trajtim në Qendrën Klinike Universitare të Kosovës.
KALLXO.com ka tentuar të marrë detaje për gjendjen e tij nga mjekët kujdestar por të njëjtit për momentin nuk kanë dhënë informacion.
KALLXO.com ka kontaktuar me drejtorin e zyrës për media në QKUK, Shpend Fazliu por i njëjti nuk ka qenë i qasshëm në telefon.
Po ashtu për të marrë informacione për rastin KALLXO.com ka kontaktuar edhe drejtoreshën e QKUK-së, Pranvera Zejnullahu- Raci por e njëjta nuk është përgjigjur.
Sulmohet me armë zjarri Policia në Zveçan
Një patrullë e Policisë së Kosovës është sulmuar mbrëmë në Zveçan me armë zjarri.
Policia e Kosovës e ka konfirmuar rastin.
“Njësitet policore deri sa kanë qenë në detyra të rregullta, në patrullim, janë sulmuar nga persona të armatosur me armë të gjata, nga një automjet i tipit Audi, ngjyrë hiri, me targa KM. Si pasojë e incidentit, një pjesëtar i Policisë së Kosovës është lënduar lehtë dhe janë shkaktuar dëme të konsiderueshme materiale në veturën e policisë” – thuhet në njoftimin e Policisë.
Dhjetëra policë të rendit janë vendosur në veri të vendit pas vendimit të institucioneve për të rritur praninë policore në këtë pjesë të Kosovës.
Rritja e pranisë policore vjen pas incidenteve të ditëve të fundit, gjatë të cilave u përdorën granata dore e u shkrepën edhe armë zjarri.
Makina me të cilën po udhëtonin ekipi i KALLXO.com, producenti Valdet Salihu dhe gazetarja Shkodrane Dakaj janë sulmuar mëngjesin e sotëm nga persona të maskuar në afërsi të Shkollës teknike në Mitrovicën e Veriut.
Ekipi i cili po udhëtonte me makinën e zyrës në drejtim të Mitrovicës së Veriut është sulmuar nga grupi i personave të maskuar të cilët po qëndrojnë në udhëkryqin e kësaj lagjeje.
Sulmuesi ka goditur me grushte makinën ndërsa mjete të forta janë hedhur edhe nga pjesëtarët e grupit.
