Personit që iu fal burgu nga Hashim Thaçi, pi shampanjë me Kadri Veselin

Granit Paçarizi, i cili është në mesin e tre personave, të cilit presidenti i vendit Hashim Thaçi i fali 1 vit nga dënimi me burg, është i afërt edhe me zyrtarë të Partisë Demokratike të Kosovës (PDK).

Në rrjetin social Facebook, Paçarizi ka fotografi në të cilat duket bashkë me kryetarin e PDK-së, Kadri Veseli e kryetarin e Degës së PDK-së në Prizren, Shaqir Totaj.

Foto: Granit Paçarizi – FacebookGranit Paçarizi ishte përfshirë në një përleshje masive në vitin 2013, ku kishte edhe persona të plagosur nga arma e zjarrit.

Paçarizi ishte akuzuar për armëmbajtje pa leje për çka edhe ishte shpallur fajtor mirëpo prokurori e kishte rihapur rastin duke e akuzuar për të dytën herë Granit Paçarizin, mirëpo, kësaj radhe për veprën penale vrasje e rëndë në tentativë.

Granit Paçarizi në ndërkohë kishte ndihmuar në  zbulimin e një rasti të korrupsionit.

Ai kishte filmuar një takim me shoferin e prokurorit nërsa dyshimet për korrupsion në Prokurorinë e Prizrenit, të ngritura nga Paçarizi dhe familjarët e tij, bën që prokurori i krimeve të rënda Bajram Hamitaga të suspendohej nga detyra nën dyshimet se kishte kërkuar 5 mijë euro ryshfet.

Pas akuzës së dytë, reaguan familjarët e Paçarizit duke e akuzuar prokurorin Hamitaga se këtë e ka bërë në shenjë hakmarrje ndaj tyre, pasi që ata nuk kishin pranuar t’i jepnin pesë mijë euro, të cilat ata thonë se prokurori ua kishte kërkuar borxh, pasi djalin e kishte të sëmurë.

Sipas Granit Paçarizit, prokurori Hamitaga ia kishte kërkuar të hollat babait të tij, Sadri Paçarizit, pasi prokurori e kishte dërguar një kositëse bari për ta ndrequr te Sadriu.

Babai i Granit Paçarizit, Sadriu kishte treguar për takimet me prokurorin Hamitaga gjatë kohës që prokurori po hetonte djalin e tij. Sadriu thotë se prokurori ua kishte kërkuar pesë mijë euro borxh me arsyetimin se e kishte djalin e sëmurë.

Për këtë rast, ‘Drejtësia në Kosovë’ kishte bërë një hulumtim ku e kishte ballafaquar edhe prokurorin Hamitaga me akuzat e familjes Paçarizi.

 

Në dekretin e 27 nëntorit 2019 të publikuar nga Zyra e Presidentit, thuhet se ky i fundit ka falur 3 persona, ndër ta edhe Granit Paçarizin.

Gjykata e Apelit e Kosovës e ka liruar përfundimisht nga akuzat për keqpërdorim të pozitës zyrtare prokurorin Bajram Hamitaga, si dhe shoferin e tij Luan Delili, i cili akuzohej për veprën penale frikësim gjatë procedurës penale.

Lidhur me këtë vendim, prokurori i rastit, Arben Ismjali ka bërë të ditur për KALLXO.com se tash ka ushtruar kërkesën për mbrojtje të ligjshmërisë në Gjykatën Supreme.

Gjykata e Apelit me 10 dhjetor 2018 ka vendosur që ta refuzoj ankesën e Prokurorisë Themelore të Gjilanit, kurse aktgjykimin e Gjykatës Themelore në Gjilan e ka vërtetuar.

 

Foto: Granit Paçarizi – Facebook

 

Gjykata e Apelit vërteton pafajësinë e ish-prokurorit Bajram Hamitaga

.