Foto: Facebook / Qendra e Studentëve - Prishtinë
Personi që vdiq te konviktet është një 26-vjeçar nga Gjilani
KALLXO.com ka raportuar sot se një person ka vdekur pasi dyshohet se ka rënë nga një prej konvikteve në Qendrën e Studentëve në Prishtinë.
Viktima është 26-vjeçar nga komuna e Gjilanit.
Mjeku Gëzim Mustafa nga Klinika Emergjente ka konfirmuar për KALLXO.com se viktima kishte arritur në QKUK me fraktura të rënda në kokë.
“Rreth orës 17:45 kemi konstatuar vdekjen e pacientit. Ka ardhur me shenja të rënda në bazën e kokës, trupit dhe me gjakderdhje dhe lëndime vdekjeprurëse”, ka thënë Mustafa.
Rastin për KALLXO.com e ka konfirmuar disa minuta më parë edhe Policia e Kosovës.
Sipas Policisë, sot rreth orës 17:20, ekipet e Emergjencës dhe Policia kanë shkuar te Qendra e Studentëve dhe nje person është përcjell me autoambulancë në drejtim të Klinikës Emergjente.
“Njësitet e Policisë dhe Forenzika kanë dalë në vendin e ngjarjes dhe pas procedurave hetimore do të sqarohen rrethanat tjera “, tha për KALLXO.com zëdhënësi i Policisë, Daut Hoxha.
Konviktet në Qendrën e Studentëve janë shndërruar në karantinë që nga paraqitjet e rasteve të para të të sëmurëve me COVID-19.
Aty janë të vendosur dhjetëra qytetarë të Kosovës, të cilët kanë ardhur nga vendet e jashtme si masë e parandalimit të përhapjes së pandemisë.