Përparim Rama ‘bëhet i gjallë’ për Lojërat Mesdhetare: Qeveria synoi të marr menaxhimin e tyre

Kryetari i Komunës së Prishtinës, Përparim Rama, ka folur për rrezikun e mosmbajtjes së Lojërave Mesdhetare Prishtina 2030.

Pas hulumtimit të KALLXO.com, edhe ai ka konfirmuar se Qeveria e Kosovës synoi të marr në dorë menaxhimin e këtyre lojërave.

“Qeveria na ka thënë që po punon në një ligj të ri për Lojërat Mesdhetare. Unë kam prit që ai ligj i ri për Lojërat Mesdhetare të mundësoj zhvillimin e shpejtë të infrastrukturës për Lojërat Mesdhetare. Ka qenë synim që të merret menaxhimi nga Qeveria, [por] këtë nuk e ka pranu Komiteti Ndërkombëtar i Lojërave Mesdhetare” – deklaroi Rama në një konferencë për media.

Ai e ka pranuar se 10 muaj kanë humbur pa u punuar si duhet për organizimin e këtyre lojërave, duke konfirmuar kështu edhe paralajmërimin që Komiteti Ndërkombëtar i Lojërave Mesdhetare i pati dhënë Kosovës.

Mes tjerash në një përgjigje për Qeverinë, ky Komiteti pati thënë se duhet të kompletohen sa më shpejtë dokumentacionet e kërkuara dhe se afati i fundit për të bërë funksional Komitetin Organizativ të Lojërave Mesdhetare Prishtina 2030 është 8 shtatori i vitit 2024.

“Tash jemi prap në tavolinë, shpresoj që shumë shpejtë do ta shqyrtojmë këtë çështje. Kemi bërë planifikime dhe po vazhdojmë të punojmë. Për fat të keq kemi pas një 10 mujor të humbur, i cili ka mund me u shfrytëzu shumë më konstruktiv se që është shfrytëzu, por shpresoj që tash e tutje nuk do e kemi atë problem” – shtoi Rama.

KALLXO.com pati dërguar pyetje përmes email-it te Rama për çështjen e rrezikimit të Lojërave Mesdhetare dhe mbarëvajtjen e organizimit të tyre. Por, në pyetjet e dërguara më 13.08.2024, as ai e as Komuna e Prishtinës nuk patën kthyer përgjigje.

Qeveria e Kosovës, i ka dërguar Lojërave Mesdhetare një marrëveshje të re ku protagonist kryesor është Qeveria e Kosovës e jo Komuna e Prishtinës siç është paraparë fillimisht nga Lojërat Mesdhetare.

Më 27.06.2024, Komiteti Ndërkombëtar i pati kthyer përgjigje Qeverisë duke i thënë që nuk munden të hyjnë në marrëveshje direkte me Qeveritë ngase ata nënshkruajnë marrëveshje me qytetet.

Dallimi kryesor mes marrëveshjes së nënshkruar më 08.09.2023 dhe asaj që e ka propozuar Qeveria e Kosovës është që në të parën organizatore është Komuna e Prishtinës e Qeveria është garantuese financiare për organizimin e Lojërave kurse në të dytën, Qeveria është vet organizatore e lojërave.

Rrezikohet mbajtja e Lojërave Mesdhetare Prishtina 2030 – Qeveria kërkon t’i organizojë vet ato