Vendi i ngjarjes nga plagosja e vrasja në Aktash, Foto Adelina Ahmeti/KALLXO.com
Përleshja e armatosur në Prishtinë, 30 ditë paraburgim për 5 të dyshuarit
Gjykata e Prishtinës ka caktuar 30 ditë paraburgim për Korab Gashin, Valdrin Ademin, Robert Llumnicën, Salih Sekiraqën dhe Fatos Abazin lidhur me rastin e datës 01.09.2024, kur nga të shtënat me armë zjarri kishte mbetur i vrarë një person dhe 5 të tjerë ishin plagosur.
Këtë për KALLXO.com e ka konfirmuar Mirlinda Gashi, zëdhënëse e Gjykatës së Prishtinës.
KALLXO.com mëson se pesë të dyshuarit nuk kanë shtuar asgjë në seancën dëgjimore të mbajtur ndaj tyre lidhur me kërkesën për caktimin e masës së paraburgimit.
Të dyshuarit kishin deklaruar se i mbështesin fjalët e avokatëve të tyre duke mos shtuar asgjë më shumë.
Arsyetimi i Gjykatës për caktimin e paraburgimit është se të pandehurit mund të ndikojnë në dëshmitarë të cilët kanë qenë prezentë, si dhe për shkak të problemeve të mëparshme të dyshuarit mund të përsërisin veprën e njëjtë penale si dhe kushti tjetër që të dyshuarit po qe se lihen në liri do i shmangen drejtësisë.
Prokuror i këtij rasti është Menduhi Kastrati, kurse gjyqtari Gëzim Ademi është parë të hyjë dhe dalë nga objektet e Qendrës Klinike Universitare të Kosovës, ku janë duke u trajtuar të dyshuarit.
Çka thotë dosja e Prokurorisë?
Sipas dosjes së Prokurorisë, më 01.09.2024 rreth orës 22:04 në kafiterinë “From” dhe jashtë saj, në rrugën “Gazmend Zajmi”, në Prishinë, për shkak të mosmarrëveshjeve të mëparshme dhe raporteve të përkeqësuara në mes të tani të pandehurve Korab Gashi dhe Salih Sekiraqa, përkatësisht familjeve Gashi dhe Sekiraqa nga Prishtina, me qëllim të qërimit të hesapeve mes tyre, “fillimisht i pandehuri Korab Gashi dhe tani i ndjeri Premtim Gashi të maskuar, të pajisur me armë zjarri pa leje në bashkëkryerje dhe me qëllimin që të privojnë nga jeta tani të pandehurin Salih Sekiraqa, djalin e tij të mitur Sh.S. dhe të pandehurin Faton Abazi, hyjnë në lokalin-kafiterinë ‘From’, ku kishte pasur edhe persona të tjerë brenda”.
Dosja e Prokurorisë më tej shpjegon se me breshëri nga armë të gjata gjuajnë në drejtim të të pandehurit Salih Sekiraqa, djalit të mitur Sh.S. dhe të pandehurit Faton Abazi e më pas i pandehuri Korab Gashi dhe tani i ndjeri Premtim Gashi, pasi veprojnë si në mënyrën e lartcekur fillojnë tërheqjen nga brenda lokalit-kafiterisë, në rrugën “Gazmend Zajmi” ku u bashkohen dhe i pandehuri Valdrin Ademi dhe persona të tjerë të dyshuar të panjohur dhe vazhdojnë përleshjen me të pandehurit Salih Sekiraqa dhe Faton Abazi.
Tutje, sipas dosjes së Prokurorisë, atyre u bashkohet edhe i pandehuri Robert Llumnica dhe persona të tjerë të panjohur, me ç’rast të pandehurve Salih Sekiraqa dhe Faton Abazi dhe Robert Llumnica u shkaktojnë lëndime trupore për çka menjëherë pas arritjes së Policisë në vendin e ngjarjes dërgohen për tretman mjekësor në QKUK Prishtinë.
Gjithnjë sipas dosjes së Prokurorisë, pasi i pandehuri Korab Gashi dhe tani i ndjeri Premtim Gashi fillojnë të tërhiqen nga lokali-kafiteria “From” të pandehurit Salih Sekiraqa dhe Faton Abazi, duke mos u përmbajtur pas kalimit të rrezikut dhe pasojave të pësuara, me qëllim të privimit nga jeta të pandehurin Korab Gashin dhe tani të ndjerin Premtim Gashi, nga brendësia e lokalit “From” dhe jashtë tij në vendin ku ka pasur persona të tjerë fillojnë t’i gjuajnë me armët e zjarri pa leje të pandehurin Korab Gashi dhe tani i ndjeri Premtim Gashi dhe të pandehurin Valdrim Ademi si dhe të pandehurit e tjerë të panjohur që u bashkohen këtyre të fundit, me ç‘rast përleshja e armatosur zhvendoset nga lokali-kafiteria “From” në rrugën “Gazmend Zajmi”.
Tutje dosja e Prokurorisë shpjegon se si pasojë e veprimeve të të pandehurve Salih Sekiraqa, Faton Abazi dhe Valdrin Ademi si dhe të pandehurve të tjerë të panjohur privohet nga jeta tani i ndjeri Premtim Gashi, i cili goditet nga pesë plumba, prej tyre dy në këmbë, një në stomak dhe një kokë.
Ndërsa, më tej sipas dosjes të gjithë të pandehurit Korab Gashi dhe Valdrin Ademi pësojnë lëndime trupore në pjesë të ndryshme të trupit për çka menjëherë pas arritjes së Policisë në vendin e ngjarjes dërgohen për tretman mjekësor në QKUK, ndërsa të pandehurit e panjohur dy prej tyre përmes përdorimit të mjetit motorik me katër rrota largohen në drejtim të pjesës së epërme të rrugës “Gazmend Zajmi”, dhe të tjerë largohen nga pjesa anësore e epërme e lokalit “From”.
