Përfundon takimi i Lajçakut dhe Escobarit me Listën Serbe, nuk deklarohen për media

Ka përfunduar takimi i emisarëve nga BE-ja, Mirosllav Lajçak dhe SHBA-ja, Gabriel Escobar me Listën Serbe, mirëpo nuk ka pasur deklarim para gazetarëve nga asnjëra palë.

Kryetari i Listës Serbe, Goran Rakiq është parë në Zyrën e Bashkimit Evropian në Kosovë, por që as Rakiq pas takimit nuk është deklaruar për media.

Emisari Escobar është parë duke u larguar nga objekti i zyrës së BE-së, së bashku me ambasadorin amerikan, Jeffrey Hovenier.

Takimi i emisarëve perëndimor me Rakiqin vjen pas takimit që patën me krerët e opozitës, Memli Krasniqi nga PDK, Lumir Abdixhiku nga LDK, si dhe Ramush Haradinaj nga AAK.

Kryetari i PDK-së, Memli Krasniqi ka folur pas takimit me me emisarin e ShBA-së për Ballkanin Perëndimor, Gabriel Escobar dhe emisarin e BE-së për dialogun Kosovë – Serbi, duke thënë se asnjëherë nuk ka parë shqetësim më të madh tek ndërkombëtaret në lidhje me situatën në Kosovë.

Sipas tij, e gjithë kjo bie nën përgjegjësinë e Qeverisë së Kosovës.

“Diskutuam për çështjet e fundit, për relacionet e Kosovës me SHBA. PDK ka luajtur një rol të rëndësishëm gjatë këtyre ditëve, sidomos pas të premtes, pasi Qeveria në mënyrë të fshehur pa koordinim ka marrë veprimet që nxitën tensione” – tha kryetari i PDK-së.

Ndërkaq, kryetari i LDK-së, Lumir Abdixhiku foli para mediave duke  thënë se një gjendje e tillë në Kosovë nuk është parë në 33 vitet e përpjekjes për liri, pavarësi e demokraci në Kosovë.

Pas takimit me emisarët Miroslav Lajçak dhe Gabriel Escobar, Abdixhiku i ka bërë thirrje edhe presidentes Vjosa Osmani, sipas tij, të jetë më e zëshme.

“Gjendje e paparë për ne në këto 33 vite përpjekje për liri, pavarësi, demokraci. Qytetarët të kuptojnë përtej populizmit, rrugën e Kurtit. Unë shpresoj të reflektojë dhe i bëjë thirrje edhe presidentes që të bëhet me e zëshme” – tha Abdixhiku para gazetarëve.

Të dy emisarët erdhën në Kosovë pas situatës së krijuar në veri të vendit.

Ata kanë arritur dje në Prishtinë, duke zhvilluar takimin e parë me kreun e ekzekutivit, Albin Kurtin, ndërsa sot pritet t’i takojnë edhe liderët e partive opozita te për të vazhduar pastaj edhe në kryeqytetin serb, Beograd.

Pas takimit të djeshëm me Kurtin, Lajçak përsëriti edhe njëherë kërkesat e BE-së, karshi palës kosovare.

“Ne kemi paraqitur propozime në emër të bashkësisë ndërkombëtare që përmban tre elemente: E para: shtensionimi i situatës në terren. E dyta: zgjedhje të reja të shpejta në veri, dhe së treti: rikthimi në dialog dhe procesi i normalizimit” – ka thënë Lajçak pas takimit.

Ndërsa Escobar theksoi se nuk ka parë kaq shumë unitet në komunitetin transatlantik dhe se pothuajse çdo mik i Kosovës ka bërë të njëjtat kërkesa.

“Nuk kam parë kaq shumë unitet në komunitetin transatlantik, nga SHBA, Bashkimi Evropian, NATO dhe pothuajse secili mik i Kosovës kanë bërë të njëjtat kërkesa. Shpresoj që do të dëgjohemi. Jemi në fillim të misionit tonë” – ka deklaruar Escobar.

Sipas zëdhënësit të BE-së Petar Stano, emisarët kanë ardhur në Kosovë rikonfirmuar kërkesat e Brukselit dhe Uashigntonit, në lidhje me hapat urgjent që duhet ndërmarrë drejt qetësimit të situatës në veri të Kosovës.

“Lajçak dhe Escobar do përcjellin thirrjet evropiane dhe amerikane ndaj Serbisë dhe Kosovës për të de-përshkallëzuar menjëherë situatën dhe për të ndërmarrë hapa që ofrojnë zgjidhje të qëndrueshme. Ndërsa platforma për zgjidhje të qëndrueshme dhe për të kërkuar zgjidhje të qëndrueshme është pikërisht dialogu i lehtësuar nga BE-ja”, ka deklaruar Peter Stano.

Faktorët ndërkombëtarë kanë theksuar disa kërkesa në lidhje me shtensionimin e situatës në veri, ndër to janë edhe mbajtja urgjente e zgjedhjeve të reja në katër komunat veriore, sigurimin e pjesëmarrjes së serbëve në këto zgjedhje dhe fillimi i punës për themelimin e Asociacionit të komunave me shumicë serbe.

Një ndër kërkesat e SHBA-së ka qenë që kryetarët e zgjedhur të mos e ushtrojnë detyrën e kryetarëve në objekte komunale por në ndërtesa alternative.

Madje SHBA ka përjashtuar ushtrinë e Kosovës nga ushtrimi “Defender Europe 23” si pasojë e ‘mosdëgjimit’ nga Qeveria e Kosovës.

Që nga mesdita e 26 majit serbët lokalë të komunave veriore të Zubin Potokut, Zveçanit dhe Leposaviqit janë grumbulluar dhe kanë protestuar duke kundërshtuar  vendosjen e kryetarëve të rinj në objektet komunale.

Katër kryetarë shqiptarë u zgjodhën në krye të katër komunave me shumicë serbe në veri të Kosovës. Betimin si kryetar komune, përveç kryetarit të Komunës së Mitrovicës së Veriut, i cili u betua në objektin e komunës, tre kryetarët e tjerë nuk e bënë në objektet e komunave por në shkolla dhe zyre të bashkësisë komunale.

Në këtë situatë, intervenoi Policia e Kosovës përmes njësiteve speciale. Ata u përplasen me protestues, ndërsa u përdor edhe gazi lotsjellës për t’i larguar turmat nga hyrjet e ndërtesave së komunave.

Tashmë në këto komuna të Kosovës ruajtjen e rendit po e bëjnë edhe trupat paqeruajtëse të NATO-s, KFOR-i.

Mirëpo, javën e kaluar ka pasur edhe përleshje mes protestuesve dhe trupave të KFOR-it, dhe dhjetëra ushtarë të KFOR-it kanë mbetur të lënduar.

SHBA-ja dhe BE-ja vazhdimisht kanë kërkuar shtendosje të situatës në veri të Kosovës.