Përfundon gjykimi i Granit Elshanit, të hënën gjykata shpall vendimin

Gjykata e Pejës sot ka përfunduar procesin gjyqësor për ngjarjet që tronditën Pejën në natën e festës së vitit të ri në vitin 2010.

Valdet Kelmendi u plagos më 2 janar të vitit 2010 gjatë një gjuajtje me armë brenda diskotekës që la tre të plagosur dhe një të vdekur.

Për këtë incident është gjykuar Granit Elshani për të dytën herë nga Gjykata e Pejës, ndërsa sot ka përfunduar procesi gjyqësor kundër tij.

21 shtatori është caktuar si datë për shpalljen e vendimit të gjykatës, në një seancë që do të mbahet nga ora 15:00.

Me këtë rast penal ka udhëhequr gjykatësi Sylë Lokaj, ndërsa akuzën e ka mbrojtur prokurori Afrim Shefkiu.

Sipas aktakuzës  natën e 2 janarit 2010 në diskotekën “City Club”, pretendohet se i akuzuari Granit Elshani kishte hyrë në këtë diskotekë dhe me dy revole të tipit “TT” kishte filluar të shtinte në drejtim të tani të ndjerit Besart Shabi dhe Valdet Kelmendi.

Siç përshkruhet në aktakuzë, natën kritike Granit Elshani shënjestër të vrasjes kishte anëtarin familjes Kelmendi, Valdetin, por ishte plagosur Besart Shabi që kishte qëlluar afër tij.

Kujtojmë se Prokuroria Speciale pretendon se në konfliktin në mes dy familjeve janë kryer 29 sulme të cilat kanë rezultuar me 23 të vrarë – 10 pjesëtarë të familjes Kelmendi, tre të familjes Elshani dhe dhjetë viktima të rastit. Në mesin e të vrarëve janë edhe dy fëmijë.