Përfundon asfaltimi i rrugëve në “Lagjen e Boshnjakëve” në Mitrovicë të Veriut

Ka përfunduar asfaltimi i rrugëve në “Lagjen e Boshnjakëve” në Mitrovicë të Veriut.

Për këtë projekt Komuna ka ndarë mbi 200 mijë euro, e sipas të parit të Mitrovicës së Veriut, Erden Atiqit, ky projekt është pjesë e iniciativave për zhvillimin e qytetit dhe ofron një qasje më të sigurt e më të lehtë për banorët.

“Ka përfunduar me sukses asfaltimi i rrugëve në Lagjen e Boshnjakëve, duke sjellë përmirësime të rëndësishme në infrastrukturën rrugore dhe cilësinë e jetës për banorët e zonës. Investimi shënon një hap të rëndësishëm drejt një infrastrukture moderne, duke përmirësuar ndjeshëm përditshmërinë dhe duke ndikuar pozitivisht në zhvillimin ekonomik dhe social të lagjes”- tha Atiq në njoftimin e tij në Facebook.

Sipas kryetarit, “këto dhe shumë rrugë të tjera që do të përfundojnë së shpejti dhe janë dëshmi që ne si Komunë jemi të vendosur të punojmë në përmirësimin e kushteve të jetesës së qytetarëve të veriut pa dallim”.

Më 08.10.2024 KALLXO.com ka raportuar për nisjen e punimeve në këtë lagje.