Pejë – Arrestohet i dyshuari për mashtrim

Policia e Kosovës ka njoftuar se ka arrestuar edhe një person të dyshuar për veprat penale ‘mashtrim’ dhe ‘dhënie e ndihmës në kryerje të veprës penale’

“Policia e Kosovës, Drejtoria Rajonale e Policisë në Pejë, Stacioni Policor në Pejë, me datën 21.11.2019 ka iniciuar dy raste të veprave penale ‘mashtrim’ dhe ‘dhënie e ndihmës në kryerje të veprës penale’. Më herët jeni të informuar lidhur me arrestimet e personave të dyshuar për veprat e lartcekura dhe sot me datë 04.12.2019 pas një pune intensive operativo-hetimore, hetuesit e Stacionit Policor në Pejë, kanë arritur të arrestojnë edhe një person të dyshuar i cili ishte në kërkim Policor”, ka njoftuar Policia.

“I dyshuari B. B. i lindur me 1991  m/k/sh, dyshohet se kishte arritur të kryej veprat duke mashtruar viktimat me identitet të rrejshëm. I njëjti ishte i kërkuar edhe për katër (4) vepra nga Gjykata Themelore, Pejë dega në Klinë dhe Gjykata Themelore në Gjakovë. Me aktvendim te Prokurorit të shtetit të dyshuarit i caktohet masa e ndalimit prej 48- orësh”, thuhet në njoftimin e Policisë.

KOMUNIKATË PËR MEDIA

Policia e Kosovës arreston katër persona të dyshuar për veprat penale ‘mashtrim’ dhe ‘dhënie e ndihmës në kryerje të veprës penale’

Pejë, 26 nëntor 2019

Policia e Kosovës, Drejtoria Rajonale e Policisë në Pejë, Stacioni Policor në Pejë, me datën 21.11.2019 ka iniciuar dy raste të veprave penale ‘mashtrim’ dhe ‘dhënie e ndihmës në kryerje të veprës penale’.

Viktima e rastit pronar i automjeteve (Rent a Car) me seli në Prishtinë, ka deklaruar se me datën 15.11.2019 një person dyshohet që me dokumente të prezantuara false, ka marrë me qira veturën ‘VW GOLF VII’, ngjyrë e bardhë dhe me targa (KS), të cilën nuk e ka kthyer më.

Viktima e rastit, tjetër po ashtu pronar i automjeteve (Rent a Car), me seli në Fushë Kosovë, ka deklaruar se me datën 09.11.2019, i njëjti person i prezantuar, dyshohet me dokumente false si më lart, ka marrë me qira veturën ‘VW GOLF VI’, ngjyrë e kaltër, me targa regjistrimi (RKS) dhe nuk e kishte kthyer veturën tek pronari.

Njësiti i hetimeve në Stacionin Policor në Pejë, menjëherë ka vazhduar me hetimin e rasteve dhe në koordinim me prokurorin e shtetit, me datën 21.11.2019 kanë shkuar në bastisje në një auto-servis në fshatin Zahaq, ku tek shtëpia e pronarëve të dyshuar kanë gjetur në posedim vetura tjera të shkatërruara në pjesë.

Njësiti i hetimeve në stacionin policor në Pejë ka vazhduar me punën hetimore në shumë lokacione, me ç’rast kanë identifikuar personin e dyshuar i cili me anë të dokumentit të falsifikuar, me datat e lartcekura kishte marrë veturat e lartcekura me qira në Prishtinë dhe në Fushë-Kosovë.

Menjëherë me datën 24.11.2019 është konsultuar prokurori i shtetit dhe me udhëzim të tij, rreth orës 23:00 hetuesit kanë arrestuar të dyshuarit, pronarë të auto-servisit, të cilët janë ndaluar për 48 orë.

Me datën 25.11.2019, hetuesit e sektorit të hetimeve të Stacionit Policor në Pejë, pas një pune intensive operativo-hetimore, bazuar në të dhënat e dëshmitë e mbledhura në terren, kanë arritur të gjejnë 50 pjesë të veturave Golf VI dhe  Golf VII, të çmontuara nga të dyshuarit në vlerë totale të dëmit rreth 30.000 (tridhjetëmijë euro).

Të dyshuarit e arrestuar lidhur me këtë rast janë:

• A. A. i lindur vitin (1992)                           m/k/sh
• A. A. i lindur vitin (1990)                           m/k/sh
• B. C. i lindur vitin (1983)                           m/k/sh
• D. N. i lindur vitin (1991)                           m/k/sh

Rasti i kompletuar me kallëzim penal ndaj të dyshuarve do të procedohet me kohë në Prokurorinë Themelore në Pejë.