Pas vërshimeve, uji në Malishevë bëhët i papijshëm
Komuna e Malishevës ka njoftuar se pas reshjeve të fundit në vend të shiut dhe borës të cilat shkaktuan vërshime në këtë qytet, uji i ujësjëllsit nuk është i pijshëm.
Përmes një postimi, komuna ka bërë të ditur se Instituti Rajonal i Shëndetit Publik në Prizren ka rekomanduar se momentalisht uji të mos përdoret pasi është jashtë parametrave të lejuar.
Tutje, thuhet e njëjta këshillë vlen edhe për familjet të cilat furnizohen nga puset.
Njoftimi i plotë i Komunës së Malishevës:
IRSHP-Uji jo i përdorshëm për pije në territorin e Malishevës
Malishevë, 9 janar
Instituti Rajonal i Shëndetit Publik në Prizren, pas analiza të bëra të ujit për pije, me kërkesën e Komunës së Malishevës, për sistemet e ujësjellësve në Malishevë, ka rekomanduar që momentalisht uji të mos përdoret për pije, pasi është jashtë parametrave të lejuar, si pasojë e ndotjes nga vërshimet.
Për këtë gjë është njoftuar edhe njësia e Hidroregjionit Jugor, të cilët janë rekomanduar të marrin masat e nevojshme, për pastrimin e ujit, ndërsa këshilla e njëjtë vlen edhe për familjet të cilat furnizohen nga puset, pasi momentalisht rekomandohet të mos përdoret uji për pije, deri në një njoftim tjetër.