Varrezat e martirëve në fshatin Krushë e Vogël- 29.08.2022
Pas raportimit të KALLXO.com, Komuna e Prizrenit pastron varrezat e martirëve në Krushë të Vogël
Komuna e Prizrenit sot ka pastruar varrezat e martirëve të fshatit Krushë e Vogël.
Në fotografitë e dërguara në adresë të KALLXO.com shihen varrezat e pastruara nga bari që i kishte mbuluar.
KALLXO.com raportoi të shtunën se varrezat e martirëve ishin mbuluar nga bari për shkak të mosmirëmbajtjes nga Komuna e Prizrenit.
Punimet për rregullimin e varrezave të 113 martirëve janë ndërprerë në fundin e muajit mars.
Sipas kontratës, shuma totale për rregullimin e 113 varrezave të martirëve të rënë në luftën e fundit në Kosovë ka kushtuar 186 mijë e 623 euro kurse operatorët ekonomikë që kanë qenë përgjegjës për t’i përfunduar punimet është Visar Kuçi B.I dhe N.P.T Bamirs.
Punimet për rregullimin e këtyre varrezave, sipas kontratës, kanë nisur më 8 mars 2021 dhe sipas obligimit është dashur të kryheshin për një vit pune, pra më 8 mars të vitit 2022.
Komuna e Prizrenit në një përgjigje për KALLXO.com kishte thënë se në këtë projekt janë kryer 85% e punimeve të planifikuara dhe ky projekt është në fazën finale. Komuna nuk ka treguar për arsyen e ndërprerjes së punimeve në muajin mars.
Sipas komunës, ka mbetur të përfundojë është pjesa e sipërme e granitit për ta vendosur mbi varreza.
“Kemi komunikuar dhe mbajtur takime me operatorin ekonomik dhe na kanë thënë që i kanë porositur granitin me pjesët përcjellëse për 113 varreza gjithsej. Gjithashtu jemi në kontakte të vazhdueshme me OE dhe shpejt do të bëhet finalja e projektit”, thuhet në përgjigjen e komunës.
Për punimet e kryera, kompania është e obliguar të garantojë 2 vjet radhazi.
