Pas pezullimit të konkursit, Sindikata e KEK-ut paralajmëron greva
Nënkryetari i Sindikatës së Re të Korporatës Energjetike të Kosovës, Nexhat Llumnica, ka paralajmëruar greva, pas pezullimit të konkursit për 171 vende pune në KEK, nga ana e Bordit të Përkohshëm të kësaj Ndërmarrje publike.
Llumnica ka shkruar në ‘Facebook’ se të gjitha qeverisjet në Kosovë që nga paslufta nuk kanë lejuar zhvillimin e kompanive publike, e që sipas tij, tash kanë filluar përgatitjet për falimentimin e KEK-ut, ku ka përmendur shkarkimin e tri bordeve brenda vitit 2020.
“Tani kur KEK-u ka mungesë të mbi 1 mijë punëtorëve, pezullohet konkursi për pranimin e punëtorëve të rinjë, madje pas testimit të tyre që vërtetë është e palogjikshme dhe maltretim ndaj qytetarëve që kanë konkuruar dhe tashmë testuar”, ka shkruar Llumnica.
Sipas tij, KEK-u rrezikon të ketë mungesë të madhe të punëtorëve e gjithashtu mund të rrezikohet procesi i prodhimit të energjisë elektrike.
“I bëjmë thirrje bordit të KEK-ut që t’i stimulojë punëtorët ashtu sikur punëtorët shëndetësor, marrë parasysh mungesën e punëtorëve dhe rrezikun për shëndetin e tyre në këtë kohë pandemie. Përndryshe, ne jemi të detyruar t’i realizojmë kërkesat tona përmes veprimeve sindikale, deri te greva”, ka shkruar në fund Llumnica.
Bordi i Përkohshëm i drejtorëve të KEK-ut sot ka mbajtur mbledhjen e parë zyrtare, të kryesuar nga Musa Misini dhe drejtorët Petrit Ibraj, Fadil Hoxha dhe Fatime Grajqevci.
Në këtë mbledhje është vendosur që të pezullohet konkursi për 171 vende pune.