Pas më shumë se një viti, Kuvendi zgjodhi bordin e OSHP-së
Kuvendi i Kosovës me 61 vota pro ka zgjedhur bordin dhe kryetarin e Organit Shqyrtues të Prokurimit (OSHP).
Kryetare e bordit u zgjodh Vjosa Gradinaj-Mexhuani, ndërsa anëtarë Nita Bejta, Kimete Gashi, Vedat Pterqoj dhe Agon Ramadani.
Nita Bejta dhe Agon Ramadani ishin propozuar direkt nga Qeveria e Kosovës pa qenë pjesë e konkursit.
Kryeministri Albin Kurti tha se Qeveria kishte ushtruar diskrecionin e saj në këtë proces pasi që komisioni përzgjedhës ishte i pakënaqur me kandidatët.
“Ajo që duhet potencuar është se komisioni ishte i pakënaqur me kandidatët që kanë aplikuar, qoftë në kuptim të përvojës së tyre profesionale dhe profesionalizimit në përgatitjen e kandidaturës. Në këtë kuptim, komisioni i kishte rekomanduar Qeverisë që të ushtrojë diskrecionin në përzgjedhjen e kandidatëve sipas të drejtës që i takon. Ky është pranuar dhe ne kemi ushtruar kompetencën tonë të garantuar me ligj dhe kemi votuar listën e kandidatëve dhe menjëherë Qeveria ka përcjellë listën dhe biografitë”, tha ai.
Arsyetimi i Qeverisë për propozimin e tre kandidatëve që nuk aplikuan në konkursin e OShP-së
Në mungesë të bordit janë grumbulluar 704 ankesa të kompanive kundër institucioneve, që kërkonin zgjidhje në OSHP.
Derisa vlera e projekteve të cilat janë bllokuar në OSHP ka shkuar mbi 200 milionë euro për shkak të mungesës së bordit, organ ky që vendos për ankesat e kompanive.
