Partitë shqiptare në Mal të Zi afër bashkimit në një listë për zgjedhje

Pesë subjekte politike shqiptare në Mali të Zi janë bashkuar për zgjedhjet parlamentare qe priten të mbahen më 30 gusht.

Këtë e ka bërë të ditur kryetari i Alternativës Shqiptare Nik Gjeloshaj përmes një shkrimi në “Facebook”.

Lista e përbashkët e partive shqiptare të bashkuar në këto zgjedhje janë; Alternativa Shqiptare, Forca e re demokratike, Lidhja Demokratike Shqiptare, Unioni i Tuzit dhe Lëvizja qytetare Perspektiva.

“Njoftojmë opinionin e gjerë se subjektet politike shqiptare: Alternativa Shqiptare e kryesuar nga Nik Gjeloshaj, Forca e re demokratika e kryesuar nga Nazif Cungu, Lidhja Demokratike Shqiptare e kryesuar nga Nikollë Camaj, Unioni i Tuzit i kryesuar nga Fadil Kajoshaj dhe Levizja qytetare Perspektiva, e kryesuar nga Amir Hollaj, duke kuptuar rëndësinë e zgjedhjeve parlamentare të 30 gushtit, kërkesën e qytetarëve, pritjen dhe ftesën e diasporës për bashkim, kanë rënë dakord që, në zgjedhjet parlamentare të 30 gushtit, të dalin në një listë të përbashkët”, ka shkruar ai.

“Mirëpo, të bindur se një listë është zgjidhja më e mirë, dhe me kërkesë të vëllezërve tonë nga diaspora, dhe insistim të asamblistit të Nju Jorkut, z. Mark Gjonaj, që t’i japim mundësinë formimit të një liste të përbashkët, për të gjitha subjektet shqiptare, nënshkrimin e marrëveshjes, të paraparë për nesër në mesditë, kemi vendosur ta shtyjmë deri në momentin kur shpresat për një veprim të tillë të jenë shuar. Mbetemi me shpresë se pritja jonë do të jap rezultat”, përfundoi Gjeloshaj.