Parashikimi i motit për pesë ditë në Kosovë e Shqipëri

Instituti Hidrometeorologjik i Kosovës ka bërë të ditur parashikimin e motit për Kosovë dhe për pesë ditët e ardhshme.

Sipas njoftimit, Kosova do të vazhdojë të mbetet nën ndikimin e masave të ajrit me presion të ndryshueshëm atmosferik.

Kjo situatë e krijuar meteorologjike do të kushtëzojë mot relativisht të qetë deri ditën e premte.

“Reshjet e parashikuara për ditën e diel, parashihen që në disa pjesë të vazhdojnë edhe gjatë orëve të para të ditës së hënë (30.11.2020). Nga dita e martë sërish parashihet të ketë stabilizim të motit deri ditën e premte, kur parashihen riga të shiut të cilat mund të vazhdojnë edhe ditën e dytë të vikendit. Në fushat termike pritet të ketë luhatje, duke bërë që mëngjeset të regjistrojnë vlera negative të temperaturave dhe ngrica të lehta, ndërsa si pasojë e rrezeve të diellit të cilat gjatë ditës do të jenë prezent, kushtet për mjegull të radiacionit (rrezatimit diellor) mbeten të njëjta si javën paraprake”, thuhet në njoftim.

IHMK-ja tutje thekson se sa i përket motit në Shqipëri, atje parashihet të ketë ndryshime më të theksuara nga java paraprake.

“Në viset e ulëta parashihen reshje të intensitetit të ulët, ndërsa në viset malore  mbi 800m parashihen reshje bore, kryesisht në zonat e veriut dhe verilindjes. Do të ketë erë me shpejtësi maksimale deri 22m/s”, vijon njoftimi.

Temperaturat minimale atje do të ulën deri -2 gradë Celsius, ndërsa maksimalet ditës parashihen të arrijnë maksimumet deri 17 gradë Celsius në jugë të Shqipërisë, ndërsa në veri të vendit, temperaturat maksimale parashihen të arrijnë deri në 15 gradë Celsius.

“Mbi territorin tonë parashihet të fryjë erë nga veriu dhe juglindja me shpejtësi deri 9m/s”, vijon njoftimi.