Ferizaj
Parambrëmjet e Maturës, komuna e Ferizajt kundër
Pothuajse në të gjitha shkollat e mesme në Kosovë, nxënësit maturantë organizojnë një ndejë të ashtuquajtur ‘parambrëmje’, por një gjë të tillë Drejtori i Arsimit në Komunën e Ferizajt, Afrim Llabjani po e kundërshton.
Drejtoria e Arsimit, Këshilli i Prindërve dhe drejtorët e shkollave të mesme në Ferizaj, sot kanë mbajtur një takim për të biseduar rreth kësaj çështje.
“Konfirmoj se Drejtoria e Arsimit, Këshilli i Prindërve dhe drejtorët e shkollave të mesme në Ferizaj distancohen nga ky organizim meqënëse nuk janë organizatorë të saj “, ka thënë Afrim Llabjani Drejtor i Arsimit në Ferizaj.
Ai gjithashtu bëri apel te prindërit që të kenë kujdes kur shqyrtojnë lejen e pjesëmarrjes së fëmijëve të tyre në këto ngjarje.
“Apeloj te prindërit që të kenë kujdes e ta shqyrtojnë lejen e pjesëmarrjes së fëmijëve të tyre në ngjarje të këtilla”, u shpreh mes tjerash Llabjani.
Gjithashtu temë tjetër që u diskutua në këtë takim ishin edhe fenomenet negative përskaj objekteve shkollore, që sipas drejtorit po e dëmtojnë procesin e rregullt mësimor.
“Qeverisja lokale ka marrë të gjitha hapat e nevojshme që të eliminohen në tërësi këto dukuri negative, por lypset reagim dhe më i fuqishëm i organeve të sigurisë dhe drejtësisë që të zhbëhen këto fenomene nga shkollat dhe hapësirat përskaj tyre”, thuhet tutje në njoftimin e komunës së Ferizajt.