Paralajmërimi i Rexhep Selimit: Nuk u frikohemi kërcënimeve
Deputeti i Lëvizjes Vetëvendosje, Rexhep Selimi, ka thënë se nuk i frikohen kërcënimeve.
Këtë deklaratë ai e bëri teksa po komentonte një aktivitet të aktivistëve të AAK-së jashtë objektit të Qeverisë me një arkivol.
“Nuk i kuptojmë mesazhet e opozitës me arkivol. A është kërcënim kjo? A mendoni që na ndalë?”, pyeti Rexhep Selimi, duke theksuar se nuk u frikohen kërcënimeve.
Rreth këtyre komenteve reagoi deputeti i AAK-së, Daut Haradinaj.
“Nuk është kërcënim, është aksion simbolik”, tha Haradinaj.
KALLXO.com raportoi rreth këtij aktiviteti të aktivistëve të AAK-së.
Policia përgënjeshtroi deklaratat e AAK-së për kinse arrestimin e këtyre aktivistëve.
Seanca e jashtëzakonshme e Kuvendit është duke u mbajtur rreth vendimit të Qeverisë për heqjen e tarifës 100 për qind ndaj produkteve serbe e boshnjake.
Kjo seancë është thirrur me kërkesë të 41 deputetëve të opozitës.
Kryeministri Kurti ka paralajmëruar se më 15 mars do ta heqë tarifën ndaj lëndës së parë nga Bosnja e Serbia.
Tarifa ndaj mallrave serbe u vendos në nëntor 2018 nga ish-Qeveria Haradinaj.
Ky i fundit ka bërë thirrje disa herë që tarifa të mos hiqet deri në njohjen e Kosovës shtet nga Serbia.