Pamje - Bastisje për drogë në Gjakovë e Deçan, shtatë persona të arrestuar
Rreth 180 bime narkotike janë asgjësuar sot në fshatin Maznik të Deçanit në një aksion të gjerë anti-drogë që është duke u zhvilluar në zonën e Dukagjinit.
Ekipet e KALLXO.com nga vendi i ngjarjes bëjnë të ditur se në dy lokacione janë gjetur bimë narkotikë duke u terur.
Në një lokacion tjetër të bastisur është gjetur edhe një thes me substancë të gatshme për treg të marihuanës.
Siç raporton ekipi i KALLXO.com, në një lokacion në qytetin e Gjakovës është gjetur rreth gjysmë kilogrami substance e dyshuar e llojit kokainë.
Në këtë aksion të Njësisë Speciale të Policisë nën udhëheqjen e Prokurorisë së Pejës, është sekuestruar një veturë e cila ka shërbyer për bartjen e kanabisit.
Gjithashtu edhe një armë e llojit AK47 është gjetur gjatë bastisjes.
Në këtë aksion janë bastisur nëntë lokacione dhe janë arrestuar shtatë persona të cilët dyshohet se e kanë kultivuar substancën e dyshuar.
Lajmin për KALLXO.com e ka konfirmuar prokurori i krimeve të rënda në Pejë, Ersan Qavolli.
Prokurori Qavolli ka konfirmuar për KALLXO.com se gjatë bastisjeve janë gjetur prova qe i lidhin këta të dyshuar me hetimin i cili ka nisur muaj me parë në ketë prokurori.
Njësitë Speciale të Policisë nën udhëheqjen e Prokurorisë së Pejës janë duke zhvilluar sot një aksion të gjerë anti-drogë në zonën e Dukagjinit.
