Osmani takon emisarin Sarrazin, kërkon vazhdimin e mbështetjes së Gjermanisë për Kosovën

Presidentja e Kosovës, Vjosa Osmani, ka pritur në takim të dërguarin e posaçëm të Republikës Federale të Gjermanisë për Ballkanin Perëndimor, Manuel Sarrazin.

Në takimin e mbajtur më 28.05.2024, është biseduar për zhvillimet e fundit politike dhe të sigurisë në vend dhe rajon, njofton Presidenca.

Siç thuhet në komunikatë, Osmani ka theksuar përkushtimin e Kosovës në procesin e integrimit evropian, duke shprehur mirënjohjen për mbështetjen e Gjermanisë. 

Presidentja Osmani ka shtruar nevojën për vazhdimin e mbështetjes gjermane për forcimin e pozitës ndërkombëtare të Kosovës si dhe përmbushjen e aspiratave për anëtarësim në Këshillin e Europës, NATO, BE dhe organizata të tjera ndërkombëtare.

Ajo ka rikonfirmuar mbështetjen e plotë për Procesin e Berlinit dhe marrëveshjet e dala nga ky proces. 

Më 27.04.2024, Asambleja Parlamentare e NATO-s e ka miratuar rekomandimin për avancimin e statusit të Kosovës nga anëtare vëzhguese në anëtare të asociuar.

Pro këtij vendimi kanë votuar shumica e vendeve anëtare, një ka qenë kundër dhe 14 kanë abstenuar.

Anëtarët e asociuar, në këtë rast edhe Kosova, mund të paraqesin dhe të kërkojnë ndryshime në rezolutat e AP të NATO-s.

Veç kësaj, shtetet me këtë status, mund të shërbejnë si raportues specialë të asociuar në komitete, për të paraqitur perspektivat e tyre në raportet NATO-Asamble Parlamentare.

Mirëpo, Kosova nuk ka arritur të futet në agjendën e Ministrave të Jashtëm të shteteve anëtare të Këshillit të Evropës (KiE), më 17.05.2024.

Nga disa shtete, Kosovës i është kërkuar dorëzimi i projektstatutit për themelimin e Asociacionit të Komunave me Shumicë Serbe në Gjykatë Kushtetuese si hap për të fituar mbështetjen e shumicës së përfaqësuesve të shteteve anëtare të KiE-së për anëtarësim në këtë organizatë.

Ministrja e Punëve të Jashtme dhe Diasporës, Donika Gërvalla- Schwarz, më 16.05.2024, i ka dërguar letër Presidentit të Asamblesë Parlamentare të Këshillit të Evropës, për siç ka thënë ajo, zotimin për përgatitjen e një drafti që parasheh “krijimin e një mekanizmi për vetmenaxhim”.

Por, pas mbetjes së Kosovë jashtë agjendës në mbledhjen e ministrave të Jashtëm, Gërvalla ka shkruar se edhe letra s’ka më relevancë.