Presidentja e Kosovës, Vjosa Osmani Foto: Facebook
Osmani në Lituani kërkon mbështetje për një proces të përshpejtuar të anëtarësimit të Kosovës në NATO
Presidentja e Kosovës, Vjosa Osmani, me ftesë të presidentit Gitanas Nauseda ka udhëtuar për vizitë zyrtare në Lituani ku në takimin me zyrtarët e lartë shtetëror ka diskutuar për partneritetin mes këtyre dy vendeve dhe sigurisë sa i përket situatës në Evropë.
Kjo e fundit është diskutuar edhe në konferencën e të dy presidentëve para mediave.
Teksa ndaj të dy presidentëve është shtruar pyetja për mendimin e tyre rreth anëtarësimit të Finlandës në NATO, e para e shtetit të Kosovës është përgjigjur duke thënë se e përkrahë një gjë të tillë, ngaqë të gjitha vendet liridashëse duhet të kontribuojnë për paqen dhe sigurinë.
Ajo madje ka shtuar se edhe Kosova duhet të ketë mbështetje sa i përket anëtarësimit në NATO, në një proces të përshpejtuar.
“Për më tepër, unë besoj se kur bëhet fjalë jo vetëm për Finlandën apo Suedinë, por edhe për vendet e rajonit tonë, Republikën e Kosovës si dhe Bosnje Hercegovinën, ne kemi nevojë për mbështetje për një proces të përshpejtuar drejt NATO-s”, ka thënë ajo.
Tutje, Osmani-Sadriu ka theksuar se antarësimi i Kosovës në NATO ka qenë frymëzim që nga viti 1999.
“Jo vetëm sepse populli i Kosovës mbi 93 për qind është pro anëtarësimit në NATO, por ka qenë frymëzimi ynë historik që nga viti 1999 kur NATO na ndihmoi dhe ndaloi gjenocidin e vazhdueshëm në vendin tonë”, u shpreh ajo.
Ndërkaq, sot Kosova e ka dorëzuar aplikimin për anëtarësim në Këshillin e Evropës.
Zyrtare: Kosova e dorëzon aplikimin për anëtarësim në Këshillin e Evropës (VIDEO)