Osmani - Ministrit të Çekisë: Është vendimtare që procesi i liberalizimit të vizave të përfundojë gjatë presidencës çeke

Presidentja e Kosovës, Vjosa Osmani ka pritur sot në takim ministrin e Jashtëm të Republikës çeke, Jan Lipavský.

Sipas njoftimit të Presidencës, Osmani ka theksuar se Çekia është aleate e rëndësishme e vendit, me të cilën thuhet se ndajnë vlera themelore demokratike dhe përkushtimin për paqe, siguri dhe të ardhmen e përbashkët në familjen euroatlantike.

“Fokusi kryesor i takimit ndërmjet Presidentes Osmani dhe ministrit Lipavský ishte çështja e liberalizimit të vizave. Në vazhdë të takimeve që ka pasur Presidentja Osmani me lidershipin çek në Pragë, Presidentja Osmani ka falënderuar ministrin Lipavský për angazhimin konstruktiv të Çekisë për t’i dhënë fund këtij procesi përgjatë Presidencës çeke” – thuhet në komunikatën e presidences.

Presidentja Osmani ka përsëritur qëndrimin se vonesa e liberalizimit të vizave për popullin e Kosovës është një padrejtësi e madhe.

“Është jashtëzakonisht e rëndësishme që liberalizimi i vizave të jetë në agjendë, prandaj llogarisim në mbështetjen çeke në këtë aspekt si bartëse e Presidencës së Këshillit të BE-së”, ka theksuar Osmani.

Krahas temës së liberalizimit të vizave, Presidentja Osmani ka folur edhe për nevojën e avancimit të rrugës evropiane për Kosovën.

Ajo ka theksuar bashkërendimin e plotë të politikave të jashtme dhe të sigurisë së Kosovës me ato të Bashkimit Evropian si dëshmi e përkushtimit të institucioneve dhe popullit të Kosovës për integrim evropian.

Në këtë drejtim, Presidentja Osmani ka përmendur që Kosova do të dorëzojë këtë vit aplikimin për statusin e vendit kandidat.

Në lidhje me dialogun me Serbinë, Osmani ka theksuar se Kosova vazhdon të jetë palë konstruktive dhe se zgjidhja e vetme që i kontribuon paqes dhe stabilitetit të qëndrueshëm është një proces i përqendruar në njohje të ndërsjellë.

Ministri çek, Lipavsky sot tha ëështja e liberalizimit të vizave është një proces që bëhet nga aspekte teknike dhe vendime politike.

Ai shtoi se është e pamundur që të paparashikohet një datë e saktë kur mund të hiqen vizat për kosovarët.

Ministri i Jashtëm çek: E pamundur të parashikohet një datë kur mund të hiqen vizat për Kosovën