Osmani: Ky çmim nuk është vetëm për mua, është për popullin tim që ka luftuar për liri
Çmimi që u jepet personaliteteve që janë të përkushtuar për forcimin e demokracisë, sundimin e ligjit, lirisë së shprehjes dhe lirisë së shtypit dhe mbrojtjes së vlerave europiane këtë vit iu nda presidentes së Kosovës, Vjosa Osmani.
Teksa mbajti një fjalim pasi u nderua me çmimin M100 Media Award, e para e shtetit tha se ky çmim nuk është vetëm për të, por për popullin e Kosovës që ka luftuar dhe që vazhdon të luftojë me vendosmëri të palëkundur për të mbrojtur liritë e fituara me vështirësi.
“Sa më shumë e mendoj, aq më shumë bindem se ky çmim nuk është vetëm për mua; ka të bëjë me atë që unë përfaqësoj” – tha Osmani në ceremoninë e zhvilluar në Potsdam të Gjermanisë.
Ajo tutje theksoi se përfaqëson një Republikë që është bërë një shembull i ndritshëm i asaj që demokracia mund të arrijë.
Në këtë ceremoni, presidentja theksoi se dëshiron që gjithashtu t’i shpreh urimet e përzemërta kryeministrit të Polonisë, Donald Tusk, i cili po ashtu u nderua me çmimin.
“Polonia dhe Kosova ndajnë të dyja një të kaluar të dhimbshme të transformuar në qëndrueshmëri të pashembullt, guxim dhe përkushtim të palëkundur ndaj vlerave demokratike” – tha e para e shtetit.
M100 Media Award Sanssouci Colloquium është një forum ndërkombëtar që mbahet një herë në vit që nga viti 2005 në qytetin e Potsdamit.
Ky forum ndërkombëtar drejtohet konceptualisht nga një bord këshillues i përbërë nga gazetarë të njohur dhe personalitete të ndryshme gjermane dhe ndërkombëtare, të cilët takohen në intervale të rregullta.
Përveç kësaj, ky bord këshillues vepron si juri për M100 Media Award dhe udhëhiqet nga kryebashkiaku i qytetit të Potsdamit, Mike Schubert.
Nominimi i presidentes Osmani është bërë nga juria e tij, propozim i mbështetur me unanimitet të plotë nga të gjithë anëtarët e jurisë.
Ky çmimi u jepet personaliteteve që janë të përkushtuar për forcimin e demokracisë, sundimin e ligjit, lirisë së shprehjes dhe lirisë së shtypit dhe mbrojtjes së vlerave europiane.
Kemi kuptuar se në garë për këtë titull kanë qenë edhe personalitete të ndryshme europiane, përfshirë presidentë dhe kryetarë qeverish.
Presidentja Vjosa Osmani është liderja e parë nga Ballkani që nderohet me çmimin ndërkombëtar M100 nga Sanssouci Colloquium.
Në njoftimin e publikuar nga M100 thuhet se presidentja Osmani “është e përkushtuar për demokracinë dhe sundimin e ligjit, si dhe për integrimin e Republikës së Kosovës në strukturat euroatlantike. Ajo angazhohet për mbrojtjen e demokracisë dhe lirisë si arritje thelbësore, përkundër të gjitha kërcënimeve dhe pengesave”.
Presidentja Vjosa Osmani është nderuar në 25-vjetorin e çlirimit të Kosovës – një sinjal i qartë se Kosova i takon familjes dhe vlerave europiane.
Me këtë çmim janë nderuar edhe personalitete të ndryshme europiane Hans-Dietrich Genscher, Bernard Kouchner, Mario Draghi, Vitali Klitschko, Alexei Nawalny, populli ukrainas dhe Lëvizja për Lirinë e Jetës së Grave Iraniane.
