Nxënësit kthehen në bankat shkollore, me maska e distancë
“Nëse e mban maskën nuk infektohesh”, thotë Ensar Reka, nxënës i klasës së gjashtë në Shkollën Fillore, “Tefik Çanga”, në Ferizaj, përderisa në fytyrë mbante maskën dhe qëndronte në distancë nga shokët dhe shoqet e tij, duke pritur mësuesen që t’i thërriste për të hyrë brenda objektit shkollor.
Për Ensarin mësimi në objektin shkollor është më i përshtatshëm sesa mësimi i zhvilluar online.
“Me mësu me kompjuter nuk më ka pëlqy se ka pas zhurma ose s’ka pas rryma ose interneti s’ka bë.”, ka thënë ai.
Në anën tjetër babai i Ensarit nga larg priste derisa djali i tij të hynte në klasë dhe përshkruan se fillimi i viti shkollor është i vështirë për prindërit.
“Në shkolla më mirë, sepse është ndryshe kur e ka mësuesin përballë, ndryshe është me telefon. Online nuk bëjke rrjeti, u ndërprejke.”, ka thënë Nysret Reka.
Ndërsa, Saranda Xhemajli me vajzën e saj ecnin në rrugën e cila të dërgonte tek objekti në të cilën ishin vendosur mësuesit e shkollës “Gjon Sereçi”.
“Ndjenja është pak e quditshme, si çdo nënë që e pret fëmijën e vet me fillu vitin shkollor me gjithë të mirat, kjo është në kushte jonormale”, ka thënë ajo.
Xhemalji mendon që nëse nuk plotësohen kushtet e nevojshme për zhvillimin e mësimit, të vazhdohet me mësimin online.
“Nëse kushte nuk janë mirë, ndoshta kish me qenë me mirë me vazhdu mësimin online”, ka shtuar ajo.
Për mësuesen Shukrije Osmani, maskat po u pamundësojnë nxënësve që të shohin buzëqeshjen e tyre, por mësimi në klasë sipas saj është me i efektshëm sesa mësimi në distancë.
“Me klasën e parë është pak e vështirë duke fillu nga distanca, nxënësit kanë dëshirë me pas socializim edhe maskat po na e zbehin pak buzëqeshjen ndaj tyre. Për mendimin tim mësimi online nuk ka qenë tepër efektiv, mësimi në shkollë është dukshëm më i mirë se mësimi online.”, ka thënë ajo.
Në shkollat e Komunës së Ferizajt janë vendosur sinjalizime dhe broshura për respektimin e rekomandimeve për t’u mbrojtur ndaj COVID-19.
Në hyrje të çdo shkollë nxënësit priten nga mësueset e tyre në hyrje dhe rregulli kryesore janë të mbahet distanca, të gjithë nxënësit të kenë maska dhe të bëhet matja e temperaturës.
Ministri i Arsimit, Ramë Likaj ka marrë vendim që mësimi të filloj në dy faza, sot ka filluar faza e parë me institucionet parashkollore, klasat 1,2 3 6 edhe klasat 10 në shkolla, ndërsa klasat 4-5 do të fillojë sipas skenarit A.
Ndërsa me 21 shtator do të fillojë mësimi për klasat 7,8,9, 11 dhe 12.
Institucionet shkollore në Kosovë janë mbyllur më 12 mars për parandalimin e përhapjes së koronavirusit. Ministria e Arsimit kishte vendosur që mësimi të vazhdojë online.