Një muaj paraburgim për kryetarin e Komunës së Kllokotit, Bozhidar Dejanoviq

Një muaj në paraburgim do të qëndroi kryetari i Komunës së Kllokotit, Bozhidar Dejanoviq.

Kështu njoftoi Gjykata Themelore në Prishtinë përmes një njoftimi për media.

Dejanoviq po akuzohet nga Prokuroria Speciale për veprën penale “Cenim i përcaktimit të lirë të votuesve”.

“Gjykata Themelore në Prishtinë – Departamenti Special ka vendosur lidhur me kërkesën e Prokurorisë Speciale të Republikës së Kosovës për caktimin e masës së paraburgimit kundër të pandehurit B.D. për shkak të dyshimit të bazuar se i njëjti ka kryer veprën penale Cenimi i përcaktimit të lirë të votuesve nga neni 210 të KPK-së”, thuhet në njoftimin e Gjykatës Themelore në Prishtinë.
“Gjyqtarja e procedurës paraprake të pandehurit B.D., i ka caktuar masën e paraburgimit në kohëzgjatje prej 1 (një) muaji, pasi që e njëjta ka konstatuar se janë përmbushur kushtet për caktimin e paraburgimit nga neni 187 paragrafi 1 nën paragrafi 1.1 e 1.2, pika 1.2.1, 1.2.2 dhe 1.2.3 të KPPRK-së”, vijon njoftimi i gjykatës.

Sipas njoftimit, Bozhidar Dejanoviq dyshohet se ka ndikuar tek punëtorët e komunës së Kllokotit dhe qytetarë të tjerë për të votuar në një mënyrë të caktuar.

“Ekziston dyshimi i bazuar se i pandehuri B.D në cilësinë e Kryetarit të Komunës së Kllokotit, ka kanosur seriozisht punëtorët e komunës së Kllokotit dhe qytetarët e kësaj komune, duke ndikuar në vullnetin e tyre që të votojnë në mënyrë të caktuar, për një subjekt të caktuar politik dhe për kandidatë të caktuar. Kundër këtij vendimi palët kanë të drejtë ankese në Gjykatën e Apelit të Kosovës”, thuhet në njoftim.

Arrestohet kryetari i Komunës së Kllokotit lidhur me zgjedhjet e 14 shkurtit 2021