Një i vdekur dhe 48 të infektuar nga coronavirusi në Serbi

Në Serbi gjatë 24 orëve të fundit ka vdekur edhe një person nga sëmundja COVID-19, që e shkakton coronavirusi i ri.

Numri i përgjithshëm i viktimave nga coronavirusi i ri ka arritur në 246, thuhet në një njoftim të ministrisë së Shëndetësisë së Serbisë.

Të enjten janë konfirmuar edhe 48 raste me COVID-19, duke çuar numrin e të infektuarve në 11,571.

Prej tyre, nga sëmundja, janë shëruar 6,910.

Autoritetet shëndetësore në Serbi kanë njoftuar se një spital i përkohshëm në Beograd, që filloi punën dy muaj më parë, do të mbyllet. Pacientët do të transferohen në një spital tjetër në afërsi të Beogradit./REL