Një grua e re vdes në Iran pas arrestimit nga Policia e Moralit- nuk respektoi rregullat për mbulimin e kokës
Një grua 22-vjeçare iraniane ka vdekur disa ditë pasi u arrestua nga policia e moralit pasi dyshohet se nuk i respektoi rregullat strikte për mbulimin e kokës.
Dëshmitarët okularë thanë se Mahsa Amini u rrah ndërsa ishte brenda një furgoni policie kur ajo u arrestua në Teheran të martën.
Policia i ka mohuar akuzat, duke thënë se zonja Amini kishte “papritur një problem në zemër”.
Ky incident është i fundit në një seri raportimesh për brutalitetin ndaj grave nga autoritetet në Iran gjatë javëve të fundit.
Familja e zonjës Amini thotë se ajo ishte një grua e re e shëndetshme dhe pa ndonjë problem shëndetësor që do ta shpjegonin ndonjë problem të papritur të zemrës.
Megjithatë, ata u informuan se ajo ishte dërguar në spital disa orë pas arrestimit të saj dhe familja tha se ajo kishte qenë në gjendje koma përpara se të vdiste të premten.
Policia e Teheranit ka deklaruar se zonja Amini ishte arrestuar për “justifikim dhe edukim” në lidhje me hixhabin, shaminë e cila është e detyrueshme për të gjitha gratë.
Vdekja e saj vjen pas raporteve në rritje për akte represive kundër grave, duke përfshirë ato që gjykohen se nuk janë në përputhje me kodin islamik të veshjes duke u ndaluar të hyjnë në zyrat qeveritare dhe bankat.
Shumë iranianë, përfshirë individë pro-qeveritarë, po shprehin zemërimin e tyre në platformat e mediave sociale në lidhje me vetë ekzistencën e Policisë së Moralit, e njohur gjithashtu si Patrulla Udhëzuese, dhe po përdorin #hashtags që përkthehen si Patrulla Vrasjeje.
Në mediat sociale janë shfaqur video ku shfaqin oficerët policorë që i ndalojnë gratë, i tërheqin zvarrë në tokë dhe i largojnë me forcë.
Shumë iranianë e fajësojnë drejtpërdrejt liderin suprem, Ali Khamenei. Një fjalim i tij i vjetër po rindahet në rrjetet sociale, në të cilin ai justifikon rolin e Policisë së Moralit dhe këmbëngul se nën sundimin islam, gratë duhet të detyrohen ta respektojnë kodin islam të veshjes.
Incidenti i fundit vetëm sa do të thellojë ndarjen midis një pjese të madhe të shoqërisë së re dhe të gjallë të Iranit dhe sundimtarëve të saj radikalë, një përçarje që duket gjithnjë e më e vështirë për t’u rregulluar./BBC
