Një gjykatë franceze dënon bashkëpunëtorët e sulmuesve të Charlie Hebdosë

Një gjykatë franceze dënoi 14 bashkëpunëtorë në lidhje me sulmet e janarit 2015 ndaj revistës satirike Charlie Hebdo dhe një supermarketi hebraik në Paris.

Mes të dënuarve ishte edhe Hayat Boumeddiene, ish-partnerja e ekstremistit islamik Amedy Coulibaly, që kishte lidhje me personat e armatosur përgjegjës për sulmin ndaj Charlie Hebdo.

Coulibaly qëlloi për vdekje një oficere policie 24 orë pas sulmit dhe u vra një ditë më pas më 9 janar nga forcat e sigurisë gjatë një rrethimi në një suprmarket hebre.

Autoritetet besojnë se Boumeddiene, një nga tre të dyshuarit që po gjykohen në mungesë, është gjallë dhe po i shmanget një urdhëri ndërkombëtar aresti të lëshuar në Siri, ku ajo është bashkuar me organizatën ISIS.

Gjyqi i Parisit filloi në shtator, me 14 të dyshuar si bashkëpunëtorë të terroristëve xhihadistë që përballen me akuza se i kanë ndihmuar ata të kryejnë disa sulme.

Sulmi në zyrat e revistës Charlie Hebdo ishte i pari në një seri sulmesh gjatë tre ditëve në janar 2015, duke shënuar fillimin e një rritje të dhunës nga ISIS-i në Evropë.

Vëllezërit Cherif dhe Said Kouachi sulmuan zyrat e revistës më 7 janar, duke qëlluar për vdekje 12 persona në emër të al-Kaidës përpara se të arratiseshin. Revista kishte botuar karikatura të Profetit Muhamed vite më herët.

Dy ditë më vonë, të premten, në prag të fillimit të ditës së shenjtë hebraike të javës, Coulibaly, një francez me origjinë nga Mali, sulmoi një supermaret hebraik, duke vrarë katër pengje në emër të Shtetit Islamik, ndërsa vëllezërit Kouachi morën kontrollin e një shtypshkronje jashtë Parisit. Sulmuesit u vranë atë ditë gjatë sulmeve të policisë.

Një rrjet tjetër luftëtarësh francezë dhe belgë të ISIS-it sulmoi Parisin përsëri më vonë në 2015, duke vrarë 130 vetë në sallën e koncertit Bataclan, stadiumin kombëtar si edhe bare dhe restorante.

14 bashkëpunëtorët në gjyq u dënuan nën akuza të ndryshme, përfshirë ndihmë në logjistikën e sulmeve të janarit 2015 dhe blerjen e armëve dhe makinave. Akuzat e lidhura me terrorizmin për disa të pandehur u rrëzuan dhe ata u dënuan për krime më të lehta. VOA