Foto: REL/Shutterstock
Nisur nga nesër qendrat e vaksinimit do punojnë çdo të shtunë
Të gjitha qendrat e vaksinimi kundër COVID-19 në vend nga nesër do të punojnë edhe në njërën nga ditët e vikendit, çdo të shtunë.
Një gjë e tillë është bërë e ditur nga ministri i Shëndetësisë Arben Vitia, i cili tha se vaksinimi do të vazhdoj edhe ditëve të shtuna duke filluar nga nesër 21 gusht 2021.
Nga të dhënat e fundit të MSh-së, bëhet e ditur se gjatë 24 orëve të fundit janë vaksinuar 22 mijë e 245 qytetarë.
Që nga 29 marsi kur ka filluar imunizimi në nivel vendi e deri më sot janë vaksinuar 666 mijë e 476 qytetarë, prej tyre 227 mijë e 581 janë vaksinuar më dy doza të vaksinës.
Një person konsiderohet i vaksinuar në momentin që vaksinohet me dy doza të vaksinës kundër COVID-19.
Në anën tjetër, Kosova sot ka pranuar 35 mijë e 100 doza të vaksinave “Pfizer” nga Shtete e Bashkuara të Amerikës.
Numri i rasteve me COVID-19 është duke thyer rekord, vetëm brenda 24 orëve katër persona të infektuar me coronavirus kanë vdekur si dhe 2 mijë e 250 të tjerë kanë rezultuar të infektuar me SARS-CoV-2 nga 11 mijë e 814 mostra të dyshimta.
Aktualisht në Kosovë janë 16 mijë e 341 raste aktive.