NISMA Socialdemokrate reagon pas 'valës' së dorëheqjeve nga partia

NISMA Socialdemokrate ka reaguar pas largimeve të njëpasnjëshme të zyrtarëve nga ky subjekt politik për të vazhduar rrugëtimin e tyre politik në krah me Haxhi Shalën, pasi që ky i fundit zyrtarizoi aderimin në Aleancën për Ardhmërinë e Kosovës (AAK).

Pas largimit të deputetit Shala nga NISMA, kjo parti mbeti pa grup paralamentar në Kuvendin e Kosovës.

NISMA Socialdemokrate përmes një postimi ka deklaruar se që nga themelimi janë ballafaquar me përpjekje të vazhdueshme që të minohet “krijimi i kësaj force të re politike” e që sipas tyre, këto përpjekje morën përmasa shumë më të mëdha gjatë zgjedhjeve parlamentare në vitin 2014.

Sipas tyre, partnerëve politikë të cilëve u kanë ofruar për asnjë çast nuk i ndërprenë veprimet e tyre kundër NISMA-s.

“Fatkeqësisht nga partnerët politikë të cilëve u ofruam mbështetje dhe ata që e kanë gojën plot premtime se “janë njerëz që e mbajnë fjalën”, për asnjë çast nuk i ndërprenë veprimet e tyre kundër nesh! Përkundrazi, në të gjitha rastet që u është dhënë mundësia, ata janë përpjekur ta dëmtojnë NISMËN Socialdemokrate. Përpjekjeve për shkatërrimin e zërit të votuesve të NISMËS Socialdemokrate iu shtuan edhe forca të reja politike, sidomos gjatë zgjedhjeve të fundit parlamentare. Përkundër të gjitha metodave që u përdorën për të na lënë jashtë Kuvendit të Kosovës, ngadhënjeu vullneti i pathyeshëm i anëtarëve dhe i simpatizantëve të NISMËS”, thuhet në postimin e NISMA në rrjetin social “Facebook”.

“E dimë se në të gjitha partitë politike ka njerëz lakmitarë që interesat e veta i vënë jo vetëm mbi partinë, por edhe mbi interesat e kombit dhe ato të shtetit. Dhe të tillët e tregojnë fytyrën e vërtetë në momentet më kritike”, thuhet mes tjerash.

KALLXO.com sot gjatë ditës kishte provuar të kontaktojë me Endrit Shalën nga kjo parti, por që i njëjti nuk deshi të prononcohet për këtë temë.

KALLXO.com ka raportuar këtë javë për disa largime nga NISMA, të njëjtit kanë publikuar edhe fotografi me Haxhi Shalën, duke thënë se po e vazhdojnë rrugëtimin politik me të.

Nga ato që KALLXO.com ka arritur të identifikoj përmes llogarisë së Haxhi Shalës janë mbi dhjetë zyrtarë mes tyre asamblistë e kryetar degësh që janë dorëhequr.

Ky është reagimi i plotë i NISMA Socialdemokrate:

Të nderuar anëtarë, simpatizantë dhe votues të Nismës Socialdemokrate;

Të nderuar qytetarë të Kosovës,

Që nga iniciativa për themelimin e NISMËS Socialdemokrate, ne jemi ballafaquar me përpjekjet e vazhdueshme që të minohet krijimi i kësaj force të re politike. Këto përpjekje dashakeqe morën përmasa shumë më të mëdha gjatë zgjedhjeve parlamentare në vitin 2014. Gjatë kohës kur të gjithë dalin në fushatë për të bindur elektoratin për programet e tyre, një fushatë e paparë deri atëherë filloi kundër nesh, me qëllim që të pamundësonin përfaqësimin e votuesve të NISMËS Socialdemokrate në Kuvendin e Kosovës.

Anëtarët dhe simpatizantët e partisë sonë e përjetuan shumë rëndë këtë fushatë shpifjesh, intrigash dhe joshjesh që përdoreshin kundër nesh, sepse vinte kryesisht nga njerëz me të cilët kemi pasur një të kaluar të përbashkët. Sidoqoftë, askush nuk mundi ta ndalë vullnetin e dhjetëra mijëra votuesve që u mobilizuan për të ngadhënjyer mbi intrigantët dhe shpifësit: NISMA Socialdemokrate atëherë (NISMA për Kosovën) u bë pjesë e Kuvendit të Kosovës!

Duke e vënë në rend të parë interesin shtetëror, NISMA Socialdemokrate i tejkaloi të gjitha ndërskëmbësat që na i vunë gjatë rrugëtimit tonë dhe zbatoi politikën e harmonizimit të qëndrimeve në interes të Kosovës. Fatkeqësisht nga partnerët politikë të cilëve u ofruam mbështetje dhe ata që e kanë gojën plot premtime se “janë njerëz që e mbajnë fjalën”, për asnjë çast nuk i ndërprenë veprimet e tyre kundër nesh! Përkundrazi, në të gjitha rastet që u është dhënë mundësia, ata janë përpjekur ta dëmtojnë NISMËN Socialdemokrate. Përpjekjeve për shkatërrimin e zërit të votuesve të NISMËS Socialdemokrate iu shtuan edhe forca të reja politike, sidomos gjatë zgjedhjeve të fundit parlamentare. Përkundër të gjitha metodave që u përdorën për të na lënë jashtë Kuvendit të Kosovës, ngadhënjeu vullneti i pathyeshëm i anëtarëve dhe i simpatizantëve të NISMËS.

Duke parë kontekstin historik nëpër të cilin kalon vendi ynë dhe rreziqet me të cilat ballafaqohet Kosova, NISMA Socialdemokrate doli me qëndrim për harmonizimin e qëndrimeve dhe bashkërenditjen e veprimeve në funksion të përballjes me padrejtësitë ndaj luftës së drejtë të UÇK-së. Dhe pikërisht në këto momente të vështira për shtetin tonë, kur na duhet uniteti, ata që rrahin gjoks se “janë njerëz të fjalës” vazhduan me joshje të anëtarëve tanë dhe forma të tjera të presionit, vetëm e vetëm që të dëmtojnë NISMËN Socialdemokrate!

E dimë se në të gjitha partitë politike ka njerëz lakmitarë që interesat e veta i vënë jo vetëm mbi partinë, por edhe mbi interesat e kombit dhe ato të shtetit. Dhe të tillët e tregojnë fytyrën e vërtetë në momentet më kritike.

Sidoqoftë, ne nuk do të ndryshojmë orientimin tonë politik për të vënë në rend të parë interesat e vendit dhe kemi bindjen e plotë që kjo gjë mund të realizohet edhe më mirë pa ata që vënë interesin e tyre personal në rend të parë. Jemi të sigurt se të gjitha përpjekjet dashakeqe kundër nesh do të dështojnë, sepse vullneti i anëtarëve, i simpatizantëve dhe i strukturave udhëheqëse të NISMËS Socialdemokrate është shumë më i madh se lakmitë dhe intrigat e dikujt tjetër!