FOTO/ Naim Krasniqi - KALLXO
Nga viti 2000 toka bujqësore është zvogëluar përreth 30 mijë ha në Kosovë
Agjencioni për Mbrojtjen e Mjedisit të Kosovës, ka publikuar raportin e treguesve mjedisor për kategoritë e mbulushmërisë së tokave në Kosovë në vitet 2000-2018.
Sipas këtyre të dhënave, në vitin 2000 kanë qenë 444,320.72 hektarë zonë bujqësore, ndërkaq në vitin 2018 kanë qenë 416,168.22 hektarë zonë bujqësore.
Sipas përllogaritjes i bie që në Kosovë në ndër vite ka pasur rënie të zonave me tokë bujqësore, për 28,152.5 hektarë më pak.
Kjo agjenci ka njoftuar se sipas të dhënave nga imazhet satelitore të vitit 2018, që janë përpunuar nga AMMK, në kuadër të projektit Implementimi i CLC 2018 (Corine Land Cover 2018) në vendet e Ballkanit Perëndimor, i mbështetur nga Agjencia e Mjedisit të Evropës, në Kosovë janë identifikuar 30 klasa të mbulueshmërisë së tokave nga 44 sa ka gjithsej nomenklatura CORINE.
“Këto klasa janë grupuar në 5 klasa kryesore ku dominojnë pyjet dhe zonat gjysmë-natyrore me rreth 57% dhe tokat bujqësore me rreth 38%, ndërsa që sipërfaqet artificiale përfaqësohen me mbi 4.6% të totalit. Rreth 0.3 % e tokave të mbuluara klasifikohen në klasën e trupave ujorë dhe zonave të lagura (ligatinat)”, thuhet në njoftim.
Sipas këtij agjencioni, nga të dhënat e prezantuara (tabela: Kategoritë e mbulueshmërisë së tokave 2000-2018 ha) vërehet se gjatë periudhës kohore 2000-2018, ka pasur rritje të vazhdueshme të sipërfaqeve artificiale (zona ndërtuese), ndërsa ka pasur zvogëlim të sipërfaqeve bujqësore.