Nga Italia tenton të hyjë në Shqipëri me 495 mijë euro përmes Muriqanit, shikoni ku i kishte fshehur

Një shqiptar me banim në Ancona të Italisë ka tentuar të hyjë në Shqipëri me 494.785 euro të padeklaruara, të cilat i kishte fshehur në pjesë të ndryshme të makinës.

56 vjeçari lindur në Tiranë kishte zgjedhur pikën kufitare të Muriqanit, si pika nga ku do të hynte në atdhe.

Strukturat hetimore të  Drejtorisë Vendore të Policisë Shkodër kishin marrë informacione në rrugë operative për personin që posedonte një shumë të madhe parash dhe tentonte për t’i futur në mënyrë të kundërligjshme nëpërmjet Pikës së Kalimit Kufitar Muriqan.

Prandaj ata kanë organizuar punën dhe në bashkëpunim të ngushtë me Policinë Kufitare të Muriqanit, finalizuan me sukses operacionin policor të koduar “Muriqani”.

“Gjatë kontrollit të ushtruar në vijën e dytë, në automjetin  tip “Benz”, që drejtohej nga shtetasi R. R., 56 vjeç, lindur në Tiranë dhe banues në Ancona, Itali, shërbimet e Policisë gjetën të fshehura në mjet, 494.785 euro, të cilat shtetasi R. R. nuk i kishte deklaruar. ”

Tufat me euro ishin fshehur në kroskot, prapa makines e prapa sediljes.

Shuma e parave u sekuestrua në cilësinë e provës materiale.

Në përfundim të veprimeve të para të kryera nga specialistët e Seksionit për Hetimin e Krimit Ekonomik e Financiar në DVP Shkodër u bë arrestimi në flagrancë i shtetasit R. R., për veprat penale “Mosdeklarimi në kufi i të hollave dhe sendeve me vlerë” dhe “Pastrimi i produkteve të veprës penale ose veprimtarisë kriminale”.

Nga strukturat hetimore të DVP Shkodër, në bashkëpunim me Prokurorinë e Rrethit Gjyqësor Shkodër, vijon puna për zbardhjen e plotë të këtij rasti/OraNews/