Nga grushtet te kërkim-faljet: LVV e PDK arrijnë paqe për konfliktin në sallën e Kuvendit

Është arritur marrëveshja për ndërmjetësim lidhur me përleshjen fizike që kishte ndodhur më 13.07.2023 në Kuvendin e Kosovës mes disa zyrtarëve të qeverisë e disa deputetëve të PDK-së.

Këtë e ka konfirmuar për KALLXO.com, avokati Florent Latifaj, avokatja Besjana Ismajli dhe avokati Ardian Megjani.

“Po është arritë marrëveshja”- tha avokati i zëvendëskryeministrit të Kosovës, Besnik Bislimit, avokati Florent Latifaj.

Ndërsa avokatja e deputetit të PDK-së, Mërgim Lushtakut – Besjana Ismajli ka deklaruar se është arritur marrëveshja e ndërmjetësimit.

“Ka përfunduar çështja në procedurën e ndërmjetësimit ku palët kanë arritur pajtim ndërmjet veti, tani lënda i dërgohet gjykatës dhe mbetet të vendoset lidhur me këtë marrëveshje”- deklaroi avokatja Ismajli.

Arritjen e kësaj marrëveshje e ka konfirmuar për KALLXO.com, edhe avokati i deputetit të PDK-së, Bekim Haxhiut, Ardian Megjani.

Avokati Megjani deklaroi se është arritur marrëveshja për ndërmjetësim dhe shtoi se kjo marrëveshje është arritur me kërkim falje.

“Si avokat i z. Bekim Haxhiu, marrëveshja është arritur me kërkim falje ndaj z. Hekuran Muratit, i cili ka pranuar kërkim faljen dhe është tërhjekur nga ndjekja penale. Po ashtu, kërkim falje ka kërkuar edhe z. Hajdar Beqa ndaj z. Hekuran Murati, i cili ka pranuar kërkim faljen dhe është tërhjekur nga ndjekja penale ndaj z. Beqa. Poashtu, kërkim falje reciproke kanë kërkuar z. Bislimi dhe z. Lushtaku, dhe, janë tërhjekur nga ndjekja penale ndaj njëri tjetrit”- tha avokati për Kallxo.com

“Po ashtu, të gjithë kanë shprehur keqardhje për ngjarjen e zhvilluar me datë 13.07.2023 në Kuvendin e Kosovës, dhe janë deklaruar se kanë raporte të mira mes veti”-shtoi tutje avokati Megjani.

Si erdhi rasti deri tek ndërmjetësimi?

Në seancën e datës 28.05.2024  Besnik Bislimi, Mërgim Lushtaku, Hajdar Beqa dhe Bekim Haxhiu  kishin zgjedhur që kjo çështje të zgjidhet me ndërmjetësim.

Ndërsa, që kjo çështje të zgjidhet me ndërmjetësim ishte pajtuar edhe pala e dëmtuar, ministri i Financave, Hekuran Murati.

Ndërmjetësimi mund të aplikohet për veprat penale të cilat janë të dënueshme me gjobë ose me burgim deri në tri vite.

Afati për të arritur marrëveshje në procedurë të ndërmjetësimit është deri në 90 ditë, përveç nëse vazhdohet me ligjin për ndërmjetësim.

Në momentin kur një lëndë procedohet me ndërmjetësim, lëndën për trajtim e merr zyra për ndërmjetësim e cila ka rolin e pavarur. Rastin në ndërmjetësim mund të referohet nga prokurori dhe gjyqtari.

Prokurori mund ta dërgojë lëndën në ndërmjetësim nëse nuk ka të ngritur aktakuzë ndaj një ose disa personave, kurse pas ngritjes së aktakuzës, ndërmjetësimi udhëzohet nga Gjyqtari i vetëm Gjykues.

Nëse palët arrijnë marrëveshje në procedurën e ndërmjetësimit, ajo marrëveshje i dërgohet Gjykatës dhe gjyqtari do të marrë aktvendim për hedhjen e aktakuzës.

Çka përmban aktakuza e Prokurorisë për përleshjen në Kuvendin e Kosovës?

Sipas dosjes së Prokurorisë, zëvendëskryeministri Besnik Bislimi akuzohet për përdorimin e forcës fizike ndaj deputetit Mërgim Lushtaku gjatë seancës së rregullt plenare të Kuvendit të Kosovës.

Incidenti ndodhi pasi Bislimi e kishte hequr një fotografi të kryeministrit Albin Kurti në formën e Pinokios, e cila ishte vendosur paraprakisht nga deputetë të Partisë Demokratike të Kosovës (PDK).

Sipas dosjes së Prokurorisë, në këtë moment, deputeti Mërgim Lushtaku, në shenjë revolte, u ngrit nga vendi i tij dhe u drejtua drejt foltores ku ndodhej kryeministri dhe me një shishe të vogël me ujë që mbante në duar, hodhi ujë në drejtim të kryeministrit Kurti.

Më pas, Bislimi, në shenjë revolte me gjendjen e krijuar, e ka përdorur shishen e tij të ujit, duke e gjuajtur dhe goditur në fytyrë të dëmtuarin Lushtaku.

Pasi kjo ndodhi, ai gjithashtu e ka goditur edhe me grushte dore në fytyrë të dëmtuarin Lushtaku.

Veprime të cilat, sipas dosjes së prokurorisë, janë regjistruar dhe shihen në kamerat e sigurisë brenda sallës së Kuvendit të Kosovës.

Më këto veprime, sipas Prokurorisë i pandehuri Bislimi ka kryer veprën penale – sulmi, të paraparë sipas Kodit Penal të Republikës së Kosovës.

Kurse, deputeti Mërgim Lushtaku sipas dosjes së prokurorisë, ka përdorur po ashtu forcë fizike kundër tani të dëmtuarit Besnik Bislimi, ashtu që pas krijimit të situatës së eskaluar në Kuvend, të përshkruar si më lartë, tani i pandehuri Mërgim Lushtaku me dashje e kishte sulmuar fizikisht të dëmtuarin Bislimin, duke e goditur të njëjtin me shuplakë në fytyrë, veprime të cilat janë regjistruar dhe shihen në kamerat e sigurisë brenda sallës së Kuvendit. Sipas Prokurorisë me këto veprime, i pandehuri ka kryer veprën penale – sulmi.

Prokuroria Themelore e Prishtinës, përmes njoftimit për media, më 30.10.2023 kishte bërë të ditur se pas zhvillimit dhe zgjerimit të hetimeve, mbledhjes dhe analizimit të provave ka ngritur aktakuzë ndaj katër të pandehurve, Besnik Bislimi, Mërgim Lushtaku, Hajdar Beqa dhe Bekim Haxhiu.

Kjo aktakuzë ka të bëjë me veprimet apo ngjarjen e datës 13.07.2023, gjatë mbajtjes së një seance plenare në ndërtesën e Kuvendit të Kosovës, e që ndodhi një përleshje fizike mes deputetëve.

Sipas akuzës, të pandehurit Besnik Bislimi, Hajdar Beqa, Mërgim Lushtaku dhe Bekim Haxhiu, ngarkohen për veprën penale – sulmi sipas dispozitave të Kodit Penal të Republikës së Kosovës. Po ashtu, i pandehuri Hajdar Beqa akuzohet edhe për veprën penale – asgjësimi apo dëmtimi i pasurisë.

Në lidhje me të pandehurin Bekim Haxhiu, sipas prokurorisë ekziston dyshimi i bazuar mirë se i njëjti ka kryer edhe veprën penale – lëndimi i lehtë trupor duke u bazuar në dispozitat e KPRK-së.

Prokuroria Themelore i kishte propozuar gjykatës që të pandehurit të shpallen fajtorë dhe të ndëshkohen në përputhje me ligjin për veprat penale për të cilat janë akuzuar.

KALLXO.com pati raportuar se gjatë kohës sa ishte duke dhënë fjalim kryeministri Albin Kurti ndodhi përplasja fizike në Kuvendin e Kosovës.

Gjatë kohës sa ministri i Financave, Hekuran Murati është ngritur nga karrigia e tij, deputeti i PDK-së, Mërgim Lushtaku ka hedhur ujë në drejtim të tij dhe më pas ka ndodhë një përleshje fizike.