Nga distanca, Kurti ia uron Myftiut Tërnava Fitër Bajramin
Kryeministri në detyrë, Albin Kurti ia ka uruar Myftiut, Naim Tërnava festën e Fitër Bajramit.
Kurti urimin ia bëri përmes një videolidhjeje.
“Sot, në prag të festës së Fiter Bajramit, Kryeministri në detyrë, z. Albin Kurti dhe Kryetari i Bashkësisë Islame të Kosovës, Myftiu Naim Tërnava, zhvilluan një video-takim. Kryeministri në detyrë, duke i uruar Fitër Bajramin, e falënderoi Myftiun Tërnava për bashkëpunimin dhe kontributin e jashtëzakonshëm që ai dhe Bashkësia Islame, si autoritete morale dhe fetare, kanë dhënë në respektimin e rregullave dhe masave për menaxhimin e pandemisë COVID-19”, thuhet në njoftimin e qeverisë në detyrë.
“Ky muaj i shenjtë për muslimanët këtë vit ka qenë edhe më i veçantë. Gjatë tij, përpos vetëpërmbajtjes nga ushqimi dhe pija, dhe solidaritetit me ata në nevojë, është paraqitur nevoja edhe për përmbajte kolektive ndaj masave të Qeverisë dhe udhëzimeve të ekspertëve shëndetësorë për t’iu shmangur grumbullimit të turmave në hapësira të mbylluar dhe vizitave familjare, në mënyrë që të parandalohet përhapja e infeksionit me COVID-19”, thuhet tutje në njoftim.
“Myftiu Tërnava tha se respektimi i institucioneve dhe profesionalistëve të fushës është parim fetar kurse mbrojtja e shëndetit publik është obglim i atillë. Në shërbim kësaj, Kryeministri në detyrë Kurti dhe Myfitu Ternava përsëritën thirrjen drejtuar qytetarëve që t’i shmangin vizitat tradicionale familjare në nder të Fiter Bajramit pasi që virusi vazhdon të jetë në mesin tonë. Sipas ekspertëve shëndetësorë, përhapja me e madhe e virusit bëhet pikërisht gjatë vizitave familjare, në ambiente të mbyllura, ku ndërveprimi fizik është i afërt”, citohet të ketë thënë Tërnava.
Relaksimi i masave nuk do të thotë relaksim i plotë dhe nënvlerësim të virusit. Kujdesi dhe vëmendja duhet të vazhdojnë të jenë e njëjtë, thuhet në fund të njoftimit.
