Nga 1 marsi patentë-shoferi i Kosovës i vlefshëm edhe në Austri

Nga 01.03.2025, shtetasit e Kosovës dhe të Shqipërisë të cilët jetojnë në Austri nuk do të kenë më nevojë që t’i nënshtrohen provimit praktik për konvertimin e patentë-shoferit.

Ambasada e Kosovës në Vjenë ka bërë të ditur se nga dita e parë e marsit, shtetasit e Kosovës që kanë një patentë-shofer të vlefshëm të lëshuar nga autoritetet e Kosovës, nuk kanë nevojë më për këtë provim.

“Shtetasit e Republikës së Kosovës që kanë një patentë-shofer, të vlefshme të lëshuar nga autoritetet e Republikës së Kosovës, nuk kanë më nevojë të japin provim praktik për konvertimin e saj në një patentë austriake.” – shkruan në njoftimin e Ambasadës, më 14.02.2025.

Ambasada tregoi se kështu janë njoftuar nga autoritetet, pasi nga 01.03.2025 hyn në fuqi ndryshimi i Rregullores zbatuese të Ligjit të Patentë-shoferëve në Austri.

Ky lehtësim vlen për të gjitha kategoritë e patentë-shoferëve, të lëshuar në Republikën e Kosovës.

Ky proces kishte filluar në shkurt të vitit 2022 – pati njoftuar ministri i Brendshëm, Xhelal Sveçla.

Një gjë e tillë ka ndodhur para pak javësh edhe nga Italia.

Nga 29.01.2025, qytetarëve të Kosovës dhe atyre italianë u ka filluar njohja e patentë-shoferëve në të dyja shtetet – kishte bërë të ditur Ministria e Punëve të Brendshme e Kosovës.

Sipas njoftimit, kjo Marrëveshje u mundëson qytetarëve “të bëjnë konvertimin e dokumenteve pa pasur nevojë t’u nënshtrohen procedurave shtesë: as nga pjesa teorike, as nga pjesa praktike”.

“Zbatimi i kësaj Marrëveshjeje është një hap i rëndësishëm drejt integrimit të qytetarëve të Kosovës, të cilët jetojnë në Republikën e Italisë.” – kishte shkruar MPB-ja, në njoftim.

Në dhjetor të vitit 2024, ministri i Punëve të Brendshme, Xhelal Sveçla kishte bërë të ditur se kanë nënshkruar Marrëveshje me Kroacinë për njohjen e ndërsjellë të patentë-shoferëve.

Ndërkaq, në vitin 2022, Ministria kishte bërë të ditur se pas njohjes së patentë-shoferëve nga Gjermania janë në proces të arritjes së Marrëveshjeve me Kanadanë, Turqinë e Austrinë.