Në mungesë të kuorumit, nuk mbahet mbledhja e Kryesisë së Kuvendit

Ka dështuar të mbahet mbledhja e Kryesisë së Kuvendit të Kosovës, e paraparë për sot, për shkak të mungesës së kuorumit.

I vetmi që ka folur për media, pas konfirmimit zyrtar se mbledhja nuk mund të mbahet, ka qenë Besnik Tahiri, kryetar i Grupit Parlamentar të Aleancës për Ardhmërinë e Kosovës. Ai tha se mbledhja e Kryesisë nuk u mbajt sepse nuk kishte anëtar të mjaftueshëm prezent dhe për Tahirin, kjo ishte një porosi jashtëzakonisht e keqe, pasi edhe pse ka fushatë zgjedhore, Kuvendi duhet ta shtroj funksionin e tij.

“I kemi pas 10 pika të diskutimit. Shihet qartë se ka mungesë të koordinimit të cilin duhet ta forcojmë si Kuvend dhe si qeveri e në veçanti në agjendën tonë legjislative”, tha Tahiri.

Ai tha se nuk duhet procesi zgjedhor të penalizoj e të ndaloj punën e Kuvendit dhe punën e Qeverisë.

Tahiri tha se edhe pse është kandidat për kryetar të Komunës së Podujevës, ka qenë prezent në mbledhje.

Në mbledhjen e Kryesisë së Kuvendit ishte parapa ky rend dite:

– Miratimi i procesverbali të mbledhjes së mëparshme të Kryesisë së Kuvendit,

Pikat e papërfunduara nga seanca plenare, e mbajtur më 16, 19, 21, 28 korrik dhe 6 gusht 2021:

-Votimi i Projektligjit nr.08/L-006 për ratifikimin e amendamentimit të Marrëveshjes ndërkombëtare me Bankën Evropiane për Investime (BEI), për financimin e Projektit për rehabilitimin e linjës hekurudhore 10,

-Votimi i Projektligjit nr.08/L-008 për ratifikimin e Marrëveshjes së bashkëpunimit ndërmjet Ministrisë së Arsimit, Shkencës, Teknologjisë dhe Inovacionit dhe Agjencisë Austriake për Zhvillim për zbatimin e Projektit “Hulumtimi dhe shkencat e aplikuara në arsimin e lartë + (HERAS+) (ada numri referues 8116-00-2020)”,

-Votimi i kërkesës së Komisionit për Bujqësi, Pylltari, Zhvillim Rural, Mjedis, Planifikim Hapësinor dhe Infrastrukturë për ndryshimin e emërtimit të këtij komisioni.

III. Pikat e papërfunduara nga Seanca plenare, e mbajtur më 12 gusht 2021:

– Votimi i Raportit vjetor të Agjencisë për Menaxhimin e Komplekseve Memoriale të Kosovës për vitin 2020.

Përgatitjet për Seancë plenare:
Deklarimet jashtë rendit të ditës,
Pyetjet parlamentare,
Miratimi i procesverbalit nga seanca e mëparshme,
Propozimi i dy (2) kandidatëve për gjyqtarë në Gjykatën Kushtetuese,
Shqyrtimi i Projektligjit nr.08/L-030 për ratifikimin e amendamentimit të Marrëveshjes së bashkëfinancimit për Projektin “Programi mbështetës për ujësjellës dhe kanalizim në zonat rurale faza (dalëse) VI’, ndërmjet Qeverisë së Republikës së Kosovës dhe Qeverisë së Zvicrës,
Shqyrtimi i Projektligjit nr.08/L-031 për ratifikimin e Marrëveshjes së Financimit “Projekti Emergjent i Kosovës për COVID-19 – Financim shtesë”, në mes të Republikës së Kosovës dhe Asociacionit Ndërkombëtar për Zhvillim,
Shqyrtimi i dytë i Projektligjit nr.08/L-003 për ndryshimin dhe plotësimin e Ligjit nr.06/L-057 për përgjegjësinë disiplinore të gjyqtarëve dhe prokurorëve,
Shqyrtimi i parë i Projektligjit nr. 08/L-029 për punimet nga metalet e çmuara,
Shqyrtimi i Raportit me rekomandime, në lidhje me Raportin e auditimit të performancës “Transparenca dhe llogaridhënia në procesin e financimit të organizatave joqeveritare”,
Formimi i Komisionit Ad-hoc për përzgjedhjen e kandidatëve për një (1) anëtar të Bordit të ankesave të mediave.
Shqyrtimi i propozimeve dhe i kërkesave.