Foto: Reuters

Në Afrikë nis vaksinimi masiv përmes COVAX-it

Vendet afrikane po nisin vaksinimin masiv kundër koronavirusit, duke përdorur vaksina të siguruara përmes skemës COVAX të Organizatës Botërore të Shëndetësisë.

Bregu i Fildishtë është ndër të parët që përfiton nga COVAX dhe vaksinimi atje nisi të hënën.

Gana po ashtu nis imunizimin këtë javë.

Presidenti i Ganës, Nana Akufo-Addo, u bë i pari në vend që mori vaksinën të hënën.

Ai iu bëri thirrje njerëzve që të vaksinohen dhe të mos besojnë në teoritë e konspiracionit që hedhin dyshime mbi programin.

Mbi 600,000 doza të vaksinës AstraZeneca pritet të shpërndahen të martën në të gjithë Ganën.

“Është e rëndësishme që unë të jap shembullin që kjo vaksinë është e sigurt, duke qenë i pari që e marr atë”, tha presidenti i Ganës, Akufo-Addo.

Nigeria po ashtu pritet të marrë katër miliona vaksina këtë javë.

Programi COVAX synon shpërndarjen e drejtë të vaksinave edhe në vendet më të varfra të botës.

Nisma drejtohet nga Organizata Botërore e Shëndetësisë dhe gjithashtu përfshin Aleancën Globale të Vaksinave dhe Koalicionin për Inovacione në Gatishmërinë Epidemike.

Kreu i OBSH-së, Tedros Adhanom Ghebreyesus, tha se kjo javë është “vetëm fillimi”./REL