Foto: Urim Krasniqi/KALLXO.com
Ndryshime në Postën e Kosovës, pas mbledhjes së djeshme të bordit, largohet zv/kryeshefi
Zëvendës kryeshefi i Postës së Kosovës, Etrit Hoti është larguar nga kjo pozitë në Postën e Kosovës.
Ky vendim erdhi pas mbledhjes së djeshme të bordit të drejtorëve të Postës.
Hoti ka thënë se punën si Ushtrues të Detyrës së zëvendës kryeshefit e ka kryer për nëntë muaj.
“Nga sot pas nëntë muajve jam liruar nga pozita e Ushtruesit të Detyrës së zëvendës kryeshefit të Postës së Kosovës. Përkushtimi, dinjiteti dhe nderi kanë qenë dhe janë parimet e mia udhëheqëse, prandaj ndihem krenar që edhe këtë detyrë e përfundova të tillë”, ka thënë Hoti.
Ai shtoi se do të vazhdoj të angazhohet për rimëkëmbjen e Postës së Kosovës dhe për të drejtat e punëtorëve.
Përveç Hotit nga pozita është larguar edhe Faton Ejupi i cili ishte Ushtrues i Detyrës së sekretarit në Postën e Kosovës.
Këto ndryshime në postë erdhën pas mbledhjes së bordit të drejtorëve të Postës ndërsa siç mëson KALLXO.com në këtë mbledhje është diskutuar edhe për raportin e brendshëm të avancimit të 111 punëtorëve të Postës, që nga dhjetori 2020 deri në qershor 2021.
KALLXO.com publikoi hulumtimin për avancimin e 111 punëtorëve të postës për të cilët kryesuesja e bordit të Postës Safije Beseni kishte thënë se janë bërë në kundërshtim me vendimin e vitit të kaluar të Qeverisë së Kosovës për ndërmarrjet publike.
