Ministri i Mjedisit, Planifikimit Hapësinor dhe Infrastrukturës, Liburn Aliu
Ndërtimi i stacionit policor në Leposaviq, ministri Aliu thotë se janë brenda afateve
Ministri i Mjedisit, Liburn Aliu ka thënë se procesi për ndërtimin e stacionit policor në Leposaviq është duke shkuar sipas afateve të parapara me ligj.
Në konferencën për media pas mbledhjes së qeverisë, Aliu tha se tani janë në procedurën e shpronësimit.
“Në pjesën veriore janë disa projekte që janë marrë seriozisht, dhe nuk mund të ecim, pa i kry procedurat e shpronësimit, pasi që të kryhen detyrat të realizohet shpronësimi dhe pastaj të vazhdohet”- tha ministri Aliu.
“Të gjitha projektet që i kemi në pjesën veriore i kemi realizuar sipas planit, edhe pse 20 vite nuk ka pasur realizim të objekteve. Jemi duke punuar në procedurat e shpronësimit, jemi në afate”- shtoi ai.
Qeveria e Kosovës në janar të këtij viti pati marrë vendim për shpalljen me interes të veçantë publik të disa pronave të paluajtshme në komunën e Leposaviqit.
Këto prona janë në zonat kadastrale Dren dhe Leshak, komuna e Leposaviqit dhe se këto prona janë të nevojshme për realizimin e “Projekteve Infrastrukturore për Interes Publik’.
Ky vendim nuk është pritur mirë nga serbët të cilët edhe kanë organizuar protesta.
