Ndahen çmimet gazetareske për hulumtimet më të mira në fushën e shpenzimeve publike

Juria profesionale i ka bërë publike vlerësimet për gazetarët në kuadër të thirrjes për tri hulumtimet më të mira në fushën e shpenzimeve publike.

Çmimet janë ndarë në kuadër të projektit ‘Promovimi i rolit të Auditorit të Përgjithshëm / ZKA në Kosovë’, i mbështetur nga Ambasada e Mbretërisë së Holandës/Ministria e Punëve të Jashtme e Holandës dhe i implementuar nga BIRN Kosova.

Për këto çmime, në garë kanë qenë 9 storie të publikuara në televizione dhe media online nga data 1 tetor 2019 deri më 30 shtator 2020.

Juria në përbërje Kreshnik Gashi, Mexhide Demolli, Leart Hoxha, Dafina Halili dhe Mustafa Skenderi kanë vlerësuar çmimin e parë  hulumtimin e gazetarit, Besnik Boletini. Çmimi i dytë është ndarë për hulumtimin e gazetares Arta Berisha, ndërsa çmimi i tretë është ndarë për gazetaren Merita Berisha- Prebreza.

Çmimi për gazetarin Besnik Boletini është ndarë për hulumtimin “Milionat e paefektshme”. Ky hulumtim shqyrton investimet e bëra në fushën e bujqësisë përmes granteve dhe subvencioneve. Mbi 238 milionë euro janë investuar në bujqësi në këtë mënyrë, me ekspertë që argumentojnë se paratë kanë treguar pak rezultate. Nivelet e importeve dhe eksporteve u analizuan si pjesë e hetimit, i cili nënvizoi jo-efektivitetin e investimeve të mëdha publike në këtë sektor. Hulumtimi mund të lexohet në këtë link.

Çmimi për gazetaren Arta Berisha është ndarë për hulumtimin “Reklamimi i punës së qeverisë në internet”. Ky hulumtim zbulon mbi dhjetëra kontrata të nënshkruara nga ministritë me portalet e lajmeve dhe faqet e internetit të tjera në kundërshtim me procedurat e tenderimit, Ligjin për Prokurimin Publik dhe etikën profesionale. Arta Berisha zbulon se sekretarët e përgjithshëm të ministrive, si dhe zyrtarë të tjerë, e kanë trajtuar buxhetin e shtetit sikur të ishin paratë e tyre, duke shpërndarë shuma të mëdha portaleve në kundërshtim me legjislacionin. Hulumtimi mund të lexohet në këtë link.

Çmimi për gazetaren Merita Berisha- Prebreza është ndarë për hulumtimin “Kontrata afatshkurta që mohojnë të drejtat e punëtorëve”. Ky hulumtim shqyrton pagat e paguara për mbi 2,000 persona të punësuar çdo vit nga institucionet publike përmes Marrëveshjeve për shërbime të veçanta, shpesh pa konkurrencë dhe në kundërshtim me ligjin. Hulumtimi zbulon se paratë publike shpesh shpenzohen për të siguruar mbështetje financiare për njerëzit e lidhur me partitë politike, si dhe militantët e partive. Hulumtimi mund të ndiqet në këtë link.