Nata e parë e festivalit “Sunny Hill”, Bebe Rexha ndez skenën

Festivali ndërkombëtar i muzikës “Sunny Hill”, është hapur më 25.07.2024, në lokacionin e ri, rreth 10 kilometra larg qytetit të Prishtinës, në Bernicë të Poshtme.

Dyert janë hapur rreth orës 14:00 nën tingujt e artistëve vendorë, të cilët e kanë mbajtur ritmin deri pak para mesnatës.

Nata e parë “i takoi” këngëtares shqiptare me famë botërore, Bebe Rexha, e cila përformoi për herë të parë në Kosovë.

Pasi këndoi disa këngë, ajo iu drejtua publikut në gjuhën shqipe.

“Unë jam Bebe Rexha dhe jam shumë e lumtur që jam në Kosovë për herë të parë me ju sonte. Gjakun e kemi një krejt”- u shpreh ajo ndërsa më pas ka nxjerr një fanellë me mbishkrimin ““J’adore Prishtina”.

Si një befasi për pjesëmarrësit, këngën “Say My Name“ e ka sjellë në versionin tradicional me tupanë e çifteli në skenë.

Ndërsa, gjatë interpretimit të këngës “Take Me Home”, Bebe Rexha doli nga skena duke iu afruar fansave për t’i takuar nga afër e për të kënduar bashkë me ta.

Përformanca e saj, që ndezi skenën kryesore të festivalit, ka zgjatur rreth një orë.

“Ju dua shumë Prishtinë, faleminderit”- tha ajo në përfundim.

Prezente në natën e parë ka qenë edhe themeluesja e festivalit, ylli kosovar me famë botërore Dua Lipa, e cila është parë në zonën ‘VIP’ duke i shijuar përformancat e kolegëve të saj shqiptarë e të huaj.

Pas mesnatës, festa ka vazhduar në skenën tjetër të festivalit, nën ritmin e Dj Regard.

Ndërsa, pjesëmarrësit mbrëmë kanë shijuar edhe përformancën e DJ dhe producentit muzikor nga Afrika Jugore, Black Coffe.

Festivali do të zgjas edhe tre netë të tjera, deri më 28.07.2024 dhe pritet të performojnë: Burna Boy, Stormzy, Dj Snake dhe shumë artistë lokalë.

Sipas organizatorëve, në secilën natë të Festivalit pritet të marrin pjesë rreth 25 mijë njerëz.

Organizatori i Festivalit ‘Sunny Hill’, Dukagjin Lipa, është shprehur se përpos imazhit të mirë për vendin, ndikimi ekonomik që sjell festivali është milionësh.

“Sunny Hill Festival” u krijua në vitin 2018, dhe deri më tani janë mbajtur tre edicione.