Nagavci takon rektorin e UP-së, premton integrim të mërgatës në UP

Transparencë të plotë dhe respektim të meritokracisë, ka kërkuar ministrja e Arsimit, Shkencës, Teknologjisë dhe Inovacionit, Arbërie Nagavci, në një takim që së bashku me zëvendësministrin e Arsimit, Dukagjin Popovci, që patën me rektorin e Universitetit të Prishtinës “Hasan Prishtina”, Naser Sahiti, si dhe menaxhmentin e këtij Universiteti.

Sipas një njoftimi për media, si prioritete, ministrja Nagavci përmendi edhe integrimin në procesin akademik të personelit nga mërgata, si dhe krijimin e Fondit për Kërkime Shkencore.

Rektori Sahiti, kërkoi mbështetjen e Ministrisë së Arsimit në sigurimin e sistemit antiplagjiaturë, si dhe sigurimin e qasjes në revista shkencor.

Nagavci e përgëzoi rektorin për vendimin e Këshillit Drejtues për ndarjen e një përqindëshit nga fondi i përgjithshëm i UP-së, për formimin e Fondit për Kërkime Shkencore, duke theksuar se çështja e kërkimeve shkencore është në prioritetet e planit qeverisës.

Ndër të tjera, Nagavci thekoi se, MASHTI ka bërë publike thirrjen për anëtarë të Këshillit Shtetëror të Cilësisë.

Ministrja kërkoi të trajtohet në mënyrë profesionale dhe të paanshme në Këshillin e Etikës rasti i profesorit universitar që përdori gjuhë të papranueshme në një postim të tij në rrjetet sociale.

Në takim u diskutua edhe për situatën e krijuar në arsimin e lartë gjatë kohës së pandemisë Covid-19, vendimin e Ministrisë për mos shtyrje të datave të Provimit të Maturës, në mënyrë që të mos ketë vonesa në pranimin e studentëve të rinj në vitin akademik 2021/2022 dhe matjen e kontingjentit të të diplomuarve, për të parë statusin e tyre pas diplomimit.