Mustafa: Arrestimi i Haki Rugovës, për ta dëmtuar atë dhe LDK-në
Kryetari i LDK-së, Isa Mustafa, për arrestimin e kryetarit të Istogut, Haki Rugovës, ka thënë se është bërë me qëllime politike, për ta dëmtuar atë dhe partinë që ata e drejtojnë.
“Arrestimi është kryer në ditën kur është diskutuar në parlament 100-ditëshi i Qeverisë. Është një qeveri pa asnjë aferë korruptive. Me këtë është munduar të njolloset qeverisja e LDK-së”, ka thënë Mustafa në një konferencë për shtyp bashkë me avokatin e Haki Rugovës, Besnik Berishën.
Kryetar i LDK-së tha se do t’u drejtohen organeve kompetente për t’iu bërë auditimi procesit, pasi që, siç ka thënë ai, ne jemi dëshmitarë që e njëjta prokurori ose prokurori të tjera nuk po i paraburgosin personat që po hetohen për keqpërdorimet të miliona eurove.
“Ne kërkojmë barazi, ne nuk dëshirojmë të krahasohemi me shembuj të këqij por të ketë drejtësi. LDK kërkon që sistemi i drejtësisë, Prokuroria dhe Policia të qëndrojë larg politikës”, ka thënë Isa Mustafa.
Sot, Gjykata e Pejës ka caktuar masën e arrestit shtëpiak ndaj Rugovës dhe një zyrtari tjetër komunal.
Kryetari i Istogut është arrestuar të premten nën dyshimin për keqpërdorim të detyrës zyrtare, konflikt interesi dhe falsifikim të dokumenteve.
Kjo nuk është hera e parë që kryetari i Istogut Haki Rugova përballet me drejtësinë.
Kjo pasi që i njëjti është duke u përballur edhe me një aktakuzë në një proces gjyqësor tjetër, ku akuzohet për konflikt të interesit, pikërisht lidhur me detyrën e tij si kryetar i Komunës së Istogut.
“Drejtësia në Kosovë” kishte raportuar për tenderët që kompania familjare e kreytarit Haki Rugova kishte fituar në Komunën e Istogut, e ku sipas deklarimit të pasurisë, përqindje në kompani kishte edhe vet kryetari Haki Rugova.
