Në bazë të një Memorandumi të Bashkëpunimit mes Ministrisë së Financave dhe Ministrisë së Arsimit, maturantëve të shkollave të mesme do t’iu ndahen 2 mijë kuponë me vlerë deri në 600 euro për të ndjekur kurse të Teknologjisë Informative.
Kriter kryesor për përfitim nga kjo masë do të jetë suksesi i lartë i nxënësit i treguar përgjatë studimeve.
Pas nënshkrimit të memorandumit, ministri i Financave, Punës dhe Transfereve, Hekuran Murati deklaroi se mësimin do e përshtasin me tregun e punës.
Sipas tij, kjo do bëhet e mundur me nënshkrimin e marrëveshjes së bashkëpunimit mes dy ministrive që u mundëson të rinjëve të marrin aftësi në tregun e punës.
Murati theksoi se me anë të kësaj marrëveshje tentojnë të shtyjnë të rinjtë që të orientohen drejt botës digjitale si treg në rritje.
Më poshtë gjeni njoftimin e plotë të ministrit Hekuran Murati:
Mësimin do t’ia përshtasim tregut të punës
Sot, bashkë me Ministren e Arsimit, Shkencës, Teknologjisë dhe Inovacionit, Arbërie Nagavci, nënshkruam marrëveshjen e bashkëpunimit e cila mundëson të rinjtë tanë të marrin aftësi të reja që do t’u duhen për tregun e punës.
Përmes këtij bashkëpunimi, do të mbështesim 2 mijë maturantë me kuponë që mbulojnë shpenzimet për ndjekjen e kurseve në fushën e teknologjisë informative dhe nxënien e aftësive dixhitale. Mbështetja do të jetë deri në 600 euro për secilin përfitues, dhe do të shtrihet në të gjitha shkollat e vendit.
Përmes kësaj mbështetjeje synojmë të nxisim të rinjtë tanë që të orientohen drejt botës dixhitale, ku tregu i punës ka nevojë të jashtëzakonshme.
Programimi, zhvillimi i web dhe apps, rrjetat kompjuterike, databazat, dizajni, marketingu online, rrjetet sociale, etj., janë disa nga fushat që do të mbështeten.
Përfituesit do të mund të zgjedhin kursin që u intereson ta ndjekin, dhe ne do të mbulojmë:
– 200 euro shpenzime të ndërlidhura
– 300 euro rimbursim për koston e kursit, dhe
– 100 euro shpërblim me rastin e kompletimit me sukses të kursit.
Kemi thënë se do ta lidhim mësimin me tregun e punës, dhe, ne si Ministri e Punës bashkë me Ministrinë e Arsimit sot bëmë hapin e parë.
